2023-06-14
Ադրբեջանը փորձում է ուժի գործադրմամբ խափանել մետալուրգիական գործարանի կառուցումը. Միրզոյան
ՀՀ ԱԳ նախարար Արարատ Միրզոյանն անդրադարձել է Երասխի ուղղությամբ հրադադարի ռեժիմի խախտումներին։
Ըստ նրա՝ այնտեղ կառուցվող մետալուրգիական գործարանն էապես նպաստելու է Հայաստանի տնտեսական զարգացմանը. «Ադրբեջանական կողմը նախ շինծու, անհիմն բնապահպանական մեղադրանքներով հանդես եկավ, մինչդեռ մենք մեր բոլոր միջազգային պարտականությունները կատարում ենք»,- ասաց Միրզոյանը՝ հավելելով, որ դրանից հետո, երբ հնչեց հայկական կողմի հերքումը, Ադրբեջանը փորձում է ուժի գործադրմամբ խափանել այդ ծրագիրը․ «Սա ոտնձգություն է Հայաստանի սահմանների նկատմամբ․ սա ոչ միայն հրադադարի խախտում է, այլև անհիմն մեղադրանքներ հնչեցնելու ու կեղծ հիմնավորում տալու միջոցով մի ծրագրի խաթարում, որ կարող է նպաստել Հայաստանի տնտեսական զարգացմանը»։
Միրզոյանը նշեց, թե Ադրբեջանը բազմիցս, այլ դերակատարների ներկայությամբ, ստանձնել է հավելյալ պարտավորություն՝ չդիմելու ուժի կիրառման։ Ադրբեջանի այս գործելաոճը, ըստ Միրզոյանի, անընդունել է հայկական կողմի համար, պետք է անընդունելի լինի նաև միջազգային հանրության համար։
Նմանատիպ Նյութեր