«Անցակետում բոլորի անձնագրերը ստուգում և հետ էին վերադարձնում, իսկ հայրիկիս անձնագիրը վերցրեցին և հետ չտվեցին»,- «Ազատություն» ռադիոկայանի հետ զրույցում ասել է այսօր ադրբեջանցիների կողմից ձերբակալված 68-ամյա Վագիֆ Խաչատրյանի դուստրը։
Նրա խոսքով՝ երբ Կարմիր Խաչի ներկայացուցիչները փորձել են ճշտել, թե ինչում է խնդիրը, պատասխանել են, թե հինգ րոպեից անձնագիրը կվերադարձնեն։
«Հինգ րոպեն դարձավ կես ժամ, հետո ասացին, որ հայրիկիս տանում են հարցաքննեն, որից հետո հետ կբերեն։ Պնդեցի, որ ես էլ իր հետ գնամ, բայց չթողեցին։
ԿՄԿԽ-ի ներկայացուցիչը պնդեց, որ երկու հոգով գնան, բայց թույլ չտվեցին, գնաց խմբի ղեկավարը, որը 10 րոպեից վերադարձավ։ Նրան մեքենայից հանել են դուրս և տեղափոխել այլ մեքենա և վերադարձել մեզ մոտ, իսկ հայրիկիս տարել են անհայտ ուղղությամբ»,- ասում է Ծովինար Խաչատրյանը։
Նա նշում է, որ իրենց ոչ մի բացատրություն չեն տվել, միայն ասել են, որ 10 րոպեով են հարցաքննելու։
Անդրադառնալով Ադրբեջանի մեղադրանքներին, Ծովինար Խաչատրյանը հերքեց դրանք․ «Դա զրպարտանք է, նա ոչ մի մարտ չի ղեկավարել։ Խորհրդային Միության տարիներին վարորդ է աշխատել։ Չեմ հասկանում, թե ինչ մեղադրանքներ են ներկայացնում»։
Նրա խոսքով՝ հայրը առողջական լուրջ խնդիրներ ունի, նրա սիրտը պետք է վիրահատեին։ Մանրամասները՝ «Ազատություն» ռադիոկայանի տեսանյութում։
Հիշեցնենք, որ Կարմիր խաչի միջազգային կոմիտեի ուղեկցությամբ Արցախից Հայաստան բուժման նպատակով տեղափոխվող Վագիֆ Խաչատրյանն առևանգվել է Ադրբեջանի սահմանապահ ծառայության ներկայացուցիչների կողմից։
Ադրբեջանի գլխավոր դատախազությունը նրան մեղադրում է հանցավոր խմբավորում ստեղծելու մեջ, որն իբր մասնակցել է 1991 թվականի դեկտեմբերի 21-ին Խոջալուի շրջանի Մեշալի գյուղում ադրբեջանցիների դեմ կատարված հանցագործություններին։
