Բայրամովը պատասխանել է ՄԱԿ ԱԽ նախագահողին

Ադրբեջանի ԱԳ նախարար Ջեյհուն Բայրամովը նշում է, որ առաջընթաց կա Հայաստանի հետ խաղաղության հաստատման և միջպետական հարաբերությունների մասին ապագա համաձայնագրի մի շարք հոդվածներում:

«Կայացած բանակցությունների ընթացքում կողմերը կարողացել են հարթել տարաձայնությունները և առաջընթացի հասնել ապագա երկկողմ խաղաղության և միջպետական հարաբերությունների հաստատման մասին համաձայնագրի մի շարք հոդվածների շուրջ», – նշում է Բայրամովը:

Այս մասին Ադրբեջանի ԱԳ նախարարը հայտնել է հուլիսի 20-ին՝ ՄԱԿ-ի անվտանգության խորհրդի նախագահողին ուղղված նամակում:

«Այս վճռական պահին միջազգային հանրության համար առավել քան երբևէ կարևոր է մերժել Հայաստանի կողմից իրականացվող մանիպուլյացիայի փորձերը և համոզել Երևանին՝ վերջապես դադարեցնել Ադրբեջանի ինքնիշխանությունն ու տարածքային ամբողջականությունը խաթարող գործողությունները, զերծ մնալ նրա ներքին գործերին միջամտելուց և փոխարենը բարեխղճորեն մասնակցել հակամարտությունից հետո հարաբերությունների կարգավորման բանակցություններին», – ընդգծել է Բայրամովը:

ԱԳ նախարարը վերահաստատել է Ադրբեջանի հանձնառությունը Հայաստանի հետ հարաբերությունների կարգավորման գործընթացին․ «Այս առումով Ադրբեջանը նախկինի պես ակնկալում է միջազգային հանրության աջակցությունը Հայաստանի հետ երկկողմ հարաբերությունների կարգավորման շարունակական գործընթացին»,- նշել է Բայրամովը: