Մեկ միլիոնից ավելի ուղևորներ արդեն թռել են FLYONE ARMENIA-ի թևերով

Մեկ միլիոնից ավելի ուղևորներ արդեն թռել են FLYONE ARMENIA-ի թևերով։

Ազգային ավիափոխադրող FLYONE ARMENIA-ն հիմնադրման օրվանից մինչ օրս արդեն տեղափոխել է մեկ միլիոնից ավելի ուղևոր դեպի աշխարհի տարբեր քաղաքներ։

Ավելի քան մեկ միլիոն մարդու նպատակ, գուցե երազանք, գործնական հանդիպում, կամ ուղղակի ճամփորդություն իրականություն է դարձել FLYONE ARMENIA-ի շնորհիվ։ Այս ցուցանիշին հասել ենք մեզ ընտրած ուղևորների շնորհիվ, ովքեր իրենց թռիչքը վստահել են հայկական ազգային ավիափոխադրողին։

Այս ձեռքբերումը նշելու համար FLYONE ARMENIA-ն անմոռանալի դարձրեց իր «միլիոներորդ» ուղևորի թռիչքը՝ նրան անակնկալ մատուցելով թռիչքից առաջ՝ Միլանի միջազգային օդանավակայանում։

Հանդիսավոր արարողությամբ FLYONE ARMENIA-ի խորհրդի նախագահ Արամ Անանյանը «միլիոներորդ» ուղևորին հանձնեց նվեր վաուչերը, որով կարելի է ձեռք բերել ավիաընկերության երթուղային ցանցի ցանկացած ուղղությամբ տոմսեր երկու անձի համար։

Ավիաընկերության «միլիոներորդ» ուղևորը Ստանիսլավ Սիմակն էր, որը իր չորս զավակների և կնոջ հետ մեկնում էր Միլանից Երևան:

Կայացած արարողության ժամանակ Արամ Անանյանը վստահությամբ նշեց, որ FLYONE ARMENIA-ն պահպանելու է զարգացման դինամիկան, և մինչև տարեվերջ կկրկնի հերթական միլիոնի ցուցանիշը՝ սահմանելով նոր նշաձող։

Շնորհակալ ենք մեր բոլոր ուղևորներին մեր հանդեպ վստահության, և մեր պատմության մի մասնիկը դառնալու համար: