Քոչարյանի անվան հետ կապվող սպանության գործով նոր երևան եկած հանգամանքի հիմքով վարույթ է հարուցվել

«Առագաստ» սրճարանում Պողոս Պողոսյանի սպանության գործով նոր երևան եկած հանգամանքի հիմքով վարույթ է հարուցվել։  Այս մասին հայտնել է ՀՀ գլխավոր դատախազի խորհրդական Գոռ Աբրահամյանը։

Պողոս Պողոսյանի սպանությունը  որակվել էր որպես անզգույշ սպանություն: Երևանի ընդհանուր իրավասության դատարանի 2002թ. փետրվարի 21-ի դատավճռով ամբաստանյալ Աղամալ Հարությունյանը մեղավոր էր ճանաչվել նշված հոդվածով և դատապարտվել 2 տարի ժամկետով ազատազրկման: Պատիժը պայմանականորեն չէր կիրառվել, սահմանվել էր փորձաշրջան՝ 1 տարի ժամանակով: Այժմ Երևանի դատախազությունում ուսումնասիրվել է նշված դեպքի վերաբերյալ Սթիվեն Ջոն Նյուտոնի ներկայացուցիչների կողմից գլխավոր դատախազին հասցեագրված դիմումը և Նյուտոնի հայտարարությունը:

Տեղեկություններն առերևույթ վկայում են այն մասին, որ Պողոս Պողոսյանը կյանքից զրկվել է ոչ թե անզգուշությամբ, այլ Աղամալ Հարությունյանի և գործով չպարզված այլ անձանց կողմից դիտավորությամբ և խուլիգանական դրդումներով:  Նոր երևան եկած հանգամանքների ուսումնասիրությամբ կզբաղվի ՀՀ քննչական կոմիտեն: