Նախարարը արգելափակում է հարյուրավոր ուսանողների, միայն թե տապալված վարկանիշը չերևա. «Հանուն որակյալ կրթության»

«Հանուն որակյալ կրթության» նախաձեռնության անդամները կրկին դիմում եմ ԿԳՄՍ նախարար Արայիկ Հարությունյանին։

Հարգելի՛ պարոն նախարար, նախ շնորհակալ ենք, որ ուղիղ 1 ամիս և 1 շաբաթ անց որոշեցիք այնուամենայնիվ անդրադառնալ ՀՊՏՀ-ի շուրջ ստեղծված իրավիճակին՝ չհրաժարվելով պատասխանել լրագրողի հարցերին: Չէինք ցանկանա այս ձևաչափով անդրադառնալ Ձեր կարծիքին, քանի որ նման ոլորտ ղեկավարող պետական պաշտոնյայից միշտ ակնկալել ենք կառուցողական և արդար որոշումներ, սակայն այն ծաղրական վերաբերմունքը և հեգնանքը, որին փորձեցիք արժանացնել որակյալ կրթության համար պայքարող ուսանողներին՝ «այդ խմբեր» անվանակոչելով, մեզ ստիպում է դա անել:

Իրականում շատ հետաքրքիր էր լսել Ձեր կարծիքը «նախկին ռեկտորի ժ/պ»-ի՝ Ձեր կողմից «բարձրացված» վարկանիշի վերաբերյալ: Թեպետ Դուք այդպես էլ խուսափեցիք նշել նրա անունը, բայց պետք է փաստել, որ եթե կար մեկը, ում շնորհիվ բարձրանում էր Ձեր՝ «հեղափոխական բարեփոխիչի» վարկանիշը, դա Ռուբեն Հայրապետյանն էր: ՀՊՏՀ-ն այն եզակի կրթական հաստատություններից էր (եթե ոչ միակը), որտեղ սկսեցին իրականացվել լուրջ և արմատական փոփոխություններ՝ ի նպաստ ուսանողների ապագայի և տնտեսության: Երբ Ձեր հակառակորդները խոսում էին կրթության ոլորտը կատարելապես ձախողելու մասին, շատերս էինք բերում մեր համալսարանի օրինակը՝ պաշտպանելով Ձեզ: Պարոն Հայրապետյանը խիզախաբար իր վրա վերցրեց բարեփոխումների հետևանքով աշխատանքից հեռացող դասախոսների բոլոր «հարվածները», որպեսզի Դուք, ոչինչ չանելով, համակարգչի առջև նստած պարծենաք Ձեր վարկանիշով, և հիմա համարձակվում եք նման բա՞ն ասել: Գոնե ասելուց հետո մի պահ մտածե՞լ եք, թե որքան անարդար և սխալ էր Ձեր հայտարարությունը:

Հարկ ենք համարում հիշեցնել ռեկտորի նախկին պաշտոնակատարի հեռանալու մասին Ձեր աղաղակող գրառման արձագանքները, որոնք այնքան բացասական էին, որ Կրթության նախարարը սկսում է արգելափակել հարյուրավոր ուսանողների, միայն թե դժգոհության ալիքը և տապալված վարկանիշը չերևան: Այդ Դու՞ք էիք վարկանիշ ապահովողը: Դե փորձե՛ք այլոց համար ևս ապահովել: Չի ստացվում, չէ՞:

Եթե դժգոհողների կամ «բողոքող ուսանողների 1%-ը» (թեպետ երևի չեք հասցրել հետևել ստորագրահավաքի երկրորդ փուլի արդյունքներին, քանզի զբաղված եք «սպամ» տարածող ուսանողներին մինչ օրս արգելափակելով) Ձեզ համար էական ցուցանիշ չէ, ապա թող այդպես լինի, այո՛, մենք եկել և պայքարում ենք հանուն արդարության և որակյալ կրթության, որոնք, ինչպես հասկանում ենք, Ձեզ համար այդպես էլ չդարձան ո՛չ արժեք, ո՛չ նպատակ:

Հարգելի՛ պարոն Հարությունյան, «գրագողության» և «գրագողի» մասին Ձեր սուբյեկտիվ ընկալումները հնչեցնելիս, որը շատ քչերն են կիսում, լավ կլիներ հիշեիք, որ Դուք նախարարն եք, իսկ ոլորտը կարգավորող օրենսդրությունն այդպիսի հասկացություններ չի նախատեսում: Ակնհայտ է, որ վիրավորանք պարունակող այդ բառերն օգտագործում եք լրիվ այլ նպատակներով: Ինչ վերաբերում է Դ. Գալոյանի գիտական աշխատանքներում արտագրությունների դեպքերին, ապա դրանք վաղուց են բացահայտվել, իսկ հրապարակվել է դեռևս միայն մի մասը: «Եթե բացահայտվեն» Ձեր արտահայտությունն այս առումով անհասկանալի է, որովհետև դրանք նույն լեզվով «copy paste»-եր են, և նույնիսկ հանձնաժողով ստեղծելն է ռեսուրսների անիմաստ կորուստ:

Վերջում հիշեցնենք Ձեզ նաև, որ ռեկտորին ընտրում է համալսարանի խորհուրդը՝ իր բոլոր շահառուներով: Եվ որևէ նախարարի սուբյեկտիվ ընկալումները «գրագողության» մասին չեն կարող խախտել համալսարանի ինքնավարությունը: Հակառակ դեպքում, կհաստատեք այն պնդումները, որ հեղափոխությունից հետո կրթության ոլորտում ոչինչ չի փոխվել: Իսկ մենք դեռևս դրան չենք ուզում հավատալ: