Կանադայի կառավարությունը Հայաստանում նոր դեսպան է նշանակել։ Պրոֆեսիոնալ դիվանագետ Էնդրյու Թերները հաջորդ ամիս կգործուղվի Երևան։ Թերների գործունեությունը հիմնականում վերաբերում է Մերձավոր Արևելքում աշխատանքին:
2022 թվականի ապրիլին Եվրամիությունում դեսպան Ստեֆան Դիոնը, ով արտաքին գործերի նախկին նախարարն էր, զեկույց էր հրապարակել այն մասին, թե ինչպես Կանադան կարող է ավելի լավ աջակցել Հայաստանի «փխրուն» ժողովրդավարությանը։
Զեկույցում ասվում էր, որ Հայաստանի հավատարմությունը ժողովրդավարությանը օրինակ է նախկին խորհրդային այլ երկրների համար:
Կանադայի արտաքին գործերի նախարար Մելանի Ջոլին 2022 թվականի հունիսին հայտարարել էր, որ Կանադան ի վերջո նոր դեսպանություն կբացի Հայաստանում։
Նրա գրասենյակը հայտնել է, որ դա կօգնի զարգացնել Օտտավայի գիտելիքները կովկասյան տարածաշրջանի մասին, «ուղղորդել Կանադայի արձագանքը զարգացող անվտանգության սպառնալիքներին», կօգնի օտարերկրացիներին՝ վիզաների, իսկ կանադացիներին՝ անձնագրային ծառայությունների հարցերում:
