ԱԺ-ում քննարկվել են «ՀՀ քաղաքացիության մասին» օրենքում առաջարկվող փոփոխությունները

ԱԺ «Քաղաքացիական պայմանագիր» խմբակցության պատգամավոր Ռուստամ Բաքոյանի հեղինակած ««Հայաստանի Հանրապետության քաղաքացիության մասին» օրենքում փոփոխություն և լրացում կատարելու մասին» օրենքի նախագծով կարգավորվում են ՀՀ քաղաքացիություն ստանալու հետ կապված որոշակի հարցեր: Այդ մասին հայտնում են ԱԺ-ից:

Նախագծի հեղինակի հավաստմամբ՝ գործող օրենքով, ի թիվս այլնի, ՀՀ քաղաքացիություն կարող է ստանալ Հայաստանի Հանրապետության քաղաքացիություն չունեցող այն անձը, որը մինչև ՀՀ քաղաքացիություն ստանալու դիմումը ներկայացնելու պահը վերջին երկու տարվա ընթացքում օրենքով սահմանված կարգով գրանցված ամուսնության մեջ է գտնվել ՀՀ քաղաքացու հետ և այդ երկու տարվա ընթացքում առնվազն 365 օր օրինական հիմքերի առկայությամբ բնակվել է ՀՀ-ում կամ ունի ՀՀ քաղաքացի զավակ, կամ որի ծնողները կամ նրանցից մեկը նախկինում ունեցել է ՀՀ քաղաքացիություն կամ ծնվել է Հայաստանի Հանրապետությունում, և որը 18 տարին լրանալուց հետո` 3 տարվա ընթացքում, դիմել է ՀՀ քաղաքացիություն ստանալու համար:

Ռուստամ Բաքոյանն առաջարկում է ՀՀ քաղաքացիություն ստանալու համար դիմելու հնարավորություն ընձեռել նաև ՀՀ քաղաքացիություն չունեցող 18 տարին լրացած այն անձին, որի ծնողն ունի ՀՀ քաղաքացիություն:

Առաջարկվում է նաև օրենքի 13-րդ հոդվածի 2-րդ մասի 2-րդ կետով սահմանված հիմքերով ՀՀ քաղաքացիություն ստանալու համար ՀՀ քաղաքացիություն չունեցող 18 տարին լրացած անձի կողմից դիմում ներկայացնելու ժամկետային սահմանափակումը հանել, քանի որ, ըստ հեղինակի, խնդիր է առաջանում, երբ 18 տարին լրացած անձը 3 տարվա ընթացքում չի դիմում քաղաքացիություն ստանալու համար:

Հեղինակը տեղեկացրել է, որ «Հայաստանում ծնված լինելու» վերաբերյալ դրույթը դուրս է գալիս գործող օրենքից, քանի որ տվյալ երկրում ծնված լինելու հանգամանքը չի կարող հիմք հանդիսանալ քաղաքացիություն ստանալու համար:

Նշվել է նաև, որ Կառավարությունը ներկայացրել է առաջարկություններ, որոնք ընդունվել են, ինչի արդյունքում էլ նախագիծը լրամշակվել է:

Ըստ Ռուստամ Բաքոյանի` հարցը քննարկվել է շահագրգիռ կազմակերպությունների հետ:

Հարակից զեկուցող, Պետական-իրավական հարցերի մշտական հանձնաժողովի անդամ Ալխաս Ղազարյանը ողջունել է նախագծի ընդունումը և գործընկերներին կոչ արել կողմ քվեարկել:

ՀՀ ներքին գործերի նախարարության Միգրացիայի և քաղաքացիության ծառայության պետ Արմեն Ղազարյանը ներկայացրել է Կառավարության դրական եզրակացությունը: Նա նաև առաջարկել է շտկել տեխնիկական բնույթի վրիպակը:

Քննարկման արդյունքում հանձնաժողովականները դրական եզրակացություն են տվել օրենսդրական նախաձեռնությանը: Այն քննարկվել է ԱԺ պետական-իրավական հարցերի մշտական հանձնաժողովի` սեպտեմբերի 28-ի հերթական նիստում: