ՀՀ-ի նկատմամբ անվտանգային պարտավորություններ ունեցող երկրները մեզ միայնակ թողեցին. վարչապետ

«2021թ. մայիսի 12-ին ադրբեջանական զորքերը խախտեցին Հայաստանի սահմանը՝ սահմանագծի՝ մոտ 100 կմ-անոց հատվածում մինչև 4 կմ ներխուժելով երկրի տարածքի խորքը։

Այս իրավիճակում Հայաստանի անվտանգության համակարգը համարվող ՀԱՊԿ-ը և երկկողմ մակարդակում Հայաստանի նկատմամբ անվտանգային պարտավորություններ ունեցող երկրները մեզ ոչնչով չօգնեցին, միայնակ թողեցին». ԵԽԽՎ նիստում հայտարարել է Հայաստանի վարչապետ Նիկոլ Փաշինյանը։

Նա ասել է, որ պառլամենտի արտահերթ ընտրություններից առաջ տեղի ունեցած այդ սադրանքի նպատակը ընտրությունները ձախողելն ու պետությունը կաթվածահար անելն էր, կամ, առնվազն, դրածո կառավարություն ձևավորելը։

Նա նշել է, որ այդ պայմաններում Հայաստանում անցկացվեցին այնպիսի ընտրություններ, որոնք ճանաչվեցին ժողովրդավարական, թափանցիկ ու մրցակցային։

Ըստ Փաշինյանի՝ 2018թ. հեղափոխությունից հետո Հայաստանում որևէ մակարդակի ընտրության արդյունքներ չեն նենգափոխվել։