Ակադեմիական քաղաքի հայեցակարգը հաստատվեց

Կառավարությունը հաստատեց «Ակադեմիական քաղաք» ծրագրի հայեցակարգը: ԿԳՄՍ նախարար Ժաննա Անդրեասյանը հայտարարեց, որ ակադեմիական քաղաքի տեղադիրքի համար նախատեսված է 17-րդ թաղամասի մերձակայքն ու «Հայֆիլմ»–ի տարածքը, որոնց մակերեսը շուրջ 700 հա է. «Ընդ որում, հիմնական տեղամասը լինելու է 17-րդ թաղամասին հարող տարածքը, «Հայֆիլմի» տարածքին անդրադառնալու ենք այն պարագայում, երբ գլխավոր հատակագծով դրա կարիքը լինի»։

Նախարարը նշեց, որ ակադեմիական քաղաքում կտեղակայվի մինչև 16 բուհ՝ մինչև 8 պետական և մինչև 8 միջազգային կամ մասնավոր բուհեր. «Ակադեմիական քաղաքի ներսում տեղաշարժը կունենա հատուկ կարգավորում՝ հեծանիվներով, էլեկտրական տրանսպորտով կամ այլ եղանակներով։ Այդտեղ բնակվելու և աշխատելու է մոտ 44.000 մարդ։ Հարևանությամբ գտնվող համայնքային կամ մասնավոր սեփական հողերի վրա անկանոն շինարարութունից խուսափելու համար ձևավորվելու է ավելի ծավալուն տարածքի զարգացման պլան»,- ասաց նա։