Իլ-76 ինքնաթիռի կործանումը ՌԴ-ն ահաբեկչություն է որակել՝ մեղադրելով Կիևին

Ռուսաստանի պաշտպանության նախարարությունը հայտարարել է, որ ուկրաինացի ռազմագերիների տեղափոխող ռուսական Իլ-76 ինքնաթիռը խոցել են ուկրաինական ուժերը, և դա անվանել է «ահաբեկչական գործողություն»։

Այս հայտարարությունն արել է ՌԴ ՊՆ պաշտոնական ներկայացուցիչ, գեներալ-մայոր Իգոր Կոնաշենկովը։

«Այսօր` ժամը 11:15-ին, Կիևի վարչակարգն ահաբեկչություն է իրականացրել` խոցելով Ռուսաստանի ռազմատրանսպորտային ավիացիայի ինքնաթիռը, որը թռչում էր Չկալովսկի օդանավակայան-Բելգորոդ երթուղով՝ տեղափոխելով ուկրաինացի զինվորականների՝ փոխանակման նպատակով», – ասել է Կոնաշենկովը։

ՌԴ պաշտպանության նախարարության տվյալներով՝ Ուկրաինայի զինված ուժերը խոցել են Իլ-76 ինքնաթիռը Խարկովի մարզից՝ օգտագործելով զենիթահրթիռային համակարգ։ Ռուսաստանի օդատիեզերական ուժերի ռադիոտեղորոշիչ համակարգերն արձանագրել են ուկրաինական երկու հրթիռների արձակում։

ՌԴ ռազմական գերատեսչությունից հայտնել են, որ ինքնաթիռում գտնվող բոլոր մարդիկ՝  անձնակազմի 6 անդամները, ուկրաինացի 65 ռազմագերիները և նրանց ուղեկցող 3 ռուս զինծառայողները, զոհվել են։