Պետական եկամուտների կոմիտեն անցկացրել է միջազգային KPI համակարգի (կատարողականի գնահատման համակարգ) ներդրման նախապատրաստական աշխատանքներ, կազմակերպվել են վերապատրաստման դասընթացներ։ Հրավիրված դասախոսները մաքսային և հարկային ծառայության ղեկավար անձնակազմերին ներկայացրել են համակարգի մեխանիզմները, միջազգային փորձն ու կիրառելիությունը։
Ըստ ՀՀ ՊԵԿ-ի հաղորդման` ուսումնական կենտրոնի դասախոսները համոզված են, որ նախաձեռնված նախապատրաստական աշխատանքները գոհացուցիչ արդյունք կտան։ «Արդյունավետության ցուցանիշներ (KPI)» թեմայով ուսումնական դասընթացի մասնակիցները ձեռքբերած գիտելիքները պետք է հաղորդեն աշխատակիցներին և ձևավորեն աշխատանքային միջավայրում դրանց կիրառելիությունը։
Պետական եկամուտների կոմիտեն նպատակ ունի ապահովելու աշխատանքի պատշաճ գնահատումը և աշխատակիցների հոսունության կասեցումը` վերոնշյալ համակարգի ներդրման միջոցով։