Որքան ուշ սկսվեն խաղաղ կարգավորման բանակցությունները, այնքան վատ կլինի Կիևի համար, քանի որ վերջին շաբաթների և ամիսների ընթացքում Ռուսաստանի հաջողությունը մարտի դաշտում ակնհայտ է դարձել բոլորի համար, Radar Armenia-ի վկայակոչմամբ` Radio Kossuth-ի եթերում ասել է Հունգարիայի արտգործնախարար Պետեր Սիյարտոն։
«Արդեն մի քանի ամիս է, ինչ արտգործնախարարների խորհուրդներում լսում եմ, որ ուկրաինացիները փորձում են ռազմաճակատում այնպիսի դիրք գրավել, որից ավելի շահավետ կարող են սկսել բանակցությունները։ Վերջին շաբաթների և մի քանի ամիսների ընթացքում բոլորին պարզ է դարձել, որ նման սցենար չի եղել, իսկ եթե եղել է, ուրեմն ձախողվել է: Ժամանակը միանշանակ Ռուսաստանի օգտին է աշխատում, ռուսները հաջողություններ են գրանցում մարտի դաշտում: Որքան ուշ լինի հրադադարը, և սկսվեն բանակցությունները, այնքան ավելի վատ կլինի Ուկրաինայի համար»,- ասել է Սիյարտոն։
Նա նաև հիշեցրել է, որ «ՆԱՏՕ-ն պաշտպանական դաշինք է, ոչ թե հարձակվողական», և «ոչ մեկի վրա հարձակվելու խնդիր չունի»։
«Հուսով եմ, ՆԱՏՕ-ի երկրների շարքում բոլորը կկարողանան առաջիկա շրջանում պատասխանատու վարքագիծ դրևսորել: Այն հայտարարությունները, որ արևմտաեվրոպական քաղաքական գործիչները նախկինում մեկը մյուսի հետևից արել են, չափազանց անպատասխանատու և վտանգավոր են նաև այն պատճառով, որ նման լարված իրավիճակում մեծ նշանակություն ունեն ոչ միայն գործողությունները, այլև խոսքերը»,- նշել է նա։
