Այսօր լրագրողների հետ ճեպազրույցում ՀՀ երրորդ նախագահ Սերժ Սարգսյանն ասել է․ «Մենք սահմանազատմանը և սահմանագծմանը դեմ չենք, մենք դեմ ենք այն մեթոդներին, որով այսօր այդ գործընթացն իրականացվում է։ Մենք կողմ ենք, որ սահմանազատումը և սահմանագծումը տեղի ունենան միջազգային պրակտիկային համահունչ»։
Ըստ Սերժ Սարգսյանի՝ քանի որ Նիկոլ Փաշինյանը Ալիևի հետ տետատետ է բանակցում, դրա համար էլ այս վիճակն է։ Նրա խոսքով՝ պետք է իշխանափոխություն անել, քանի որ ուրիշ կերպ հնարավոր չէ։
Անդրադառնալով Ալմա Աթայի սկզբունքի մասին հարցին՝ Սարգսյանը դա նմանեցրել է «մյունխենյան սկզբունքին». «Ալմա Աթայի սկզբունքը մեր այսօրվա խոսույթում նմանեցնում եմ, հիշում եք, «մյունխենյան սկզբունք» էր դրվել անունը ինչ-որ մի գարեջրատանը, այ դրան եմ նմանեցնում, որովհետև այդպիսի սկզբունք որևէ տեղ գոյություն չուներ։ Այո, եղել է Ալմա Աթայի հայտարարություն, եղել է արձանագրության ստորագրություն, բայց այնտեղ ի՞նչ սկզբունք է։ Դուք տեղյա՞կ եք՝ այնտեղ ինչ սկզբունք է ամրագրվել»։
Դիտարկմանը, թե սկզբունքն այն է, որ Հայաստանի տարածքը նախկին Խորհրդային Հայաստանի տարածքն է, Սարգսյանը հակադարձել է, որ այդպիսի սկզբունք չի եղել. «Այնտեղ եղել է ԽՍՀՄ փլուզման մասին հայտարարություն։ Իսկ Խորհրդային Հայաստանի տարածքը որոշվել է 1988 թ․ Խորհրդային Հայաստանի և Խորհրդային Ադրբեջանի կառավարությունների միջև ստորագրված համաձայնագրով»։
Հարցին՝ կլինի՞ Բագրատ Սրբազանի կողքին՝ հարթակում, ՀՀ երրորդ նախագահն ասել է, որ ամեն ինչի պատրաստ են, միայն թե այս շարժումը հաջողության հասնի, և իշխանափոխություն լինի։
