Օլիմպիադային ընդառաջ զինադադարից հրաժարվելու համար Մակրոնը դատապարտել է Պուտինին

Ֆրանսիայի նախագահ Էմանուել Մակրոնը դատապարտել է Ռուսաստանի նախագահ Վլադիմիր Պուտինին՝ Օլիմպիադայի ժամանակ Ուկրաինայի հետ զինադադարի առաջարկից հրաժարվելու համար: Ըստ The Hill-ի` Մակրոնը հայտարարել է, որ Պուտինի մերժումը ցույց է տալիս ամբողջ աշխարհին, որ նա «պատրաստ չէ խաղաղության»․

«Սա կարևոր պահ է իրավիճակը պարզաբանելու համար, քանի որ մինչ այժմ ամեն շաբաթ նախագահ Պուտինը հայտարարում էր, որ պատրաստ է խաղաղության,- ասել Է Մակրոնը,- բայց հիմա, երբ Պուտինին խաղաղության կոնկրետ առաջարկ է արվում, նա մերժում է։ Այնպես որ, աշխարհում բոլորին է ակնհայտ, որ հենց նա է որոշել պատերազմ սկսել և պատրաստ չէ խաղաղության», – ասել Է Մակրոնը:

Ֆրանսիայի նախագահը նաև հավելել է, որ կարևոր է համարում Օլիմպիադայի օգտագործումը որպես խաղաղության հաստատման գործում առաջընթացի հասնելու պահ, և պետք է «առավելագույն ճնշում գործադրել նրանց վրա, ովքեր որոշել են պատերազմ սկսել»՝ նկատի ունենալով Պուտինին:

Մակրոնը նաև ասել է, որ Օլիմպիադան կարող է «շատ լավ հնարավորություն» դառնալ Չինաստանի հետ կապեր հաստատելու և խաղաղության հասնելու ուղղությամբ համատեղ աշխատելու համար․

«Ինձ համար զինադադարը վերջնական նպատակ չէ։ Կայուն խաղաղություն՝ սա է վերջնական նպատակը», – ասել է նա՝ միաժամանակ նշելով, որ շատ կարևոր է օգտագործել այդ «պատուհանը» օլիմպիական խաղերի ժամանակ։

Օլիմպիական խաղերը Ֆրանսիայում կմեկնարկեն այս ամառ՝ հուլիսի 26-ին: Մակրոնը վաղուց է պնդում հրադադարի մասին, որը, ինչպես ինքն է ասել, օլիմպիական խաղերի անցկացման վաղեմի ավանդույթի մի մասն է: