Երիտասարդությունը եղել և մնում է հասարակությունների շարժիչ ուժը. Սիմոնյան

Ազգային ժողովի նախագահ Ալեն Սիմոնյանը շնորհավորական ուղերձ է հղել Երիտասարդության միջազգային օրվա կապակցությամբ:

«Հարգելի՛ երիտասարդներ,

Շնորհավորում եմ ձեզ Երիտասարդության միջազգային օրվա կապակցությամբ:Երիտասարդությունը եղել և մնում է հասարակությունների շարժիչ ուժը, ինչն առավել տեսանելի ու կարևոր է մեր երկրի պարագայում:

Հայաստանում երիտասարդության ներուժի օգտագործումը գնալով էլ ավելի մեծ չափերի է հասնում՝ հատկապես 2018 թվականի Թավշյա հեղափոխությունից հետո, որի հաղթական առանցքում հենց երիտասարդությունն էր:

Արժևորելով երիտասարդության դերն ու նշանակությունը՝ ցանկանում եմ, միևնույն ժամանակ, արձանագրել, որ այն դեռևս իր ամբողջ պոտենցիալով չի օգտագործվում մեր երկրի պետականաշինության գործընթացում:

Վստահեցնում եմ՝ Հայաստանի իշխանությունները բաց են ձեզ հուզող տարբեր խնդիրների քննարկումներով և պատրաստակամ՝ դրանց լուծումներ տալուն:

Սիրելի՛ երիտասարդներ, խորհուրդս է ձեզ՝ մշտապես ինքնակրթվել, լինել նպատակասլաց ու պահանջատեր քաղաքացի՝ ծառայեցնելով ձեռք բերված գիտելիքները հանուն մեր երկրի վառ ապագայի»,- նշվում է ուղերձում: