Մանրամասներ՝ ՋԷԿ-ում պայթյունից տուժածների առողջական վիճակից

Երեկ «ՀրազՋԷԿ» ԲԲԸ-ի չգործող ձուլարանում տեղի ունեցած պայթյունից տուժած քաղաքացիները դեռ գտնվում են վերակենդանացման բաժանմունքում. այս մասին Radar Armenia-ն տեղեկացավ Հրազդան բժշկական կենտրոնից` հավելելով, որ տուժածների վիճակը գնահատվում է կայուն։

ՀՀ առողջապահության նախարարությունից էլ հայտնեցին. «Տուժածներից մեկը, որի առողջական վիճակը երեկ ծայրահեղ ծանր էր, այսօր կայուն ծանր վիճակում է․ վիրահատվել է, վիրահատությունը բարեհաջող է անցել, գիտակցության է։ Երկու պացիենտի առողջական վիճակը գնահատվում է միջին ծանրության, առաջիկա օրերին նախատեսվում են պլանային վիրահատություններ, մյուս երկուսի վիճակը թեթև է»։

Հիշեցնենք՝ սեպտեմբերի 10-ին, ժամը 16։49-ին Կոտայքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ «ՀրազՋԷԿ» ԲԲԸ-ի չգործող ձուլարանում տեղի է ունեցել պայթյուն, որի հետևանքով մահացել է 1978 թ. ծնված քաղաքացի, ևս 5 տեղափոխվել է Հրազդանի բժշկական կենտրոն։