«Ռեստարտ»-ը նոր նախաձեռնություն է սկսում, որի նպատակը Հայաստանում իրավական համակարգի բարեփոխումների միջոցով երկրում տեղի ունեցած թավշյա հեղափոխությունն ավարտին հասցնելն է։ Ուսանողական-քաղաքացիական նախաձեռնությունն այսօր առաջին ակցիան իրականացրեց Ազգային անվտանգության ծառայության մոտ՝ հիշեցնելով, որ 2018 թվականի ապրիլին համընդհանուր հանրության բողոքի և ցանկության արդյունքում տեղի ունեցավ հեղափոխություն, որի գլխավոր նպատակներից մեկը պետք է լիներ Հայաստանի ժողովրդի արժանապատվության վերականգնումը։
«Ռեստարտ» նախաձեռնության անդամ Դավիթ Պետրոսյանի խոսքով՝ հայ հանրությունը շարունակում է անվստահություն ունենալ մեր իրավապահ ինստիտուտների նկատմամբ, իսկ առանց վստահության՝ թավշյա հեղափոխությունն ավարտված լինել չի կարող։ Պետրոսյանը մտահոգություն հայտնեց, որ սոցիալական ցանցերում իրական մարդիկ ֆեյքերով երկրում ատելության մթնոլորտ են փորձում սերմանել, իսկ ԱԱԾ-ն նրանց բացահայտելու քայլեր չի ձեռնարկում։
Նախաձեռնության անդամները պատրաստվում են հերթով հանդիպել իրավապահ համակարգի ներկայացուցիչների հետ, նրանց հետ բաց քննարկումներ ունենալ։ Առաջին հանդիպումը կլինի վաղը ոստիկանության պետի պաշտոնակատար Արման Սարգսյանի հետ։
Նախաձեռնության անդամները կոչ են անում բոլոր քաղաքացիներին միանալ իրենց սկսած գործին։
https://www.facebook.com/davidpetrosyan.david/videos/3705390502808208/
