Չնայած Իրանի հասցեին եվրոպական երկրների կոշտ հայտարարություններին, հոկտեմբերի 2-ին Իսլամական հանրապետության արտաքին գործերի նախարար Աբաս Արաղչին հեռախոսազրույցներ է ունեցել Մեծ Բրիտանիայի, Գերմանիայի եւ Ֆրանսիայի պաշտոնակիցների հետ: Այդ մասին հայտնում է Irna-ն եւ մեջբերում Իրանի արտաքին քաղաքական գերատեսչության ղեկավարի գնահատականը. «Իսրայելի դեմ Իրանի հրթիռային հարձակումը ինքնապաշտպանական ակտ է եւ լիովին համապատասխանում է ՄԱԿ-ի Կանոնադրությանը»։
Իրանն ընդամենն օգտվել է ինքնապաշտության իր օրինական իրավունքից, որ սահմանված է ՄԱԿ-ի Կանոնադրության 51-րդ հոդվածով եւ թիրախ է ընտրել բացառապես ռազմական բազաները եւ անվտանգության օբյեկտները,-մեկնաբանել է Իրանի արտաքին գործերի նախարարը:
Ամփոփելով՝ Արաղչին ասել է, որ «ռազմագործողությունն ավարտված է, բայց եթե սիոնիստական ռեժիմը մտադրված է պատասխան գործողությունների դիմել, ապա մեր պատասխանը կլինի ավելի կոշտ»:
Նրա ընդհանրացմամբ՝ «Իրանի իսլամական հանրապետությունը չի ձգտում էսկալացիայի եւ պատերազմի, բայց եւ պատերազմից չի վախենում»։
Եվրոպական երեք առաջատար երկրների արտգործնախարարներն, անշուշտ, չէին կարող լիովին ընդունել իրանական տեսակետը, բայց փաստը, որ Լոնդոնը, Բեռլինը եւ Փարիզը բավական բարձր մակարդակով հաղորդակցվել են Թեհրանի հետ, վկայում է, որ իրավիճակը գնահատվում է ամենայն լրջությամբ:
Այս իմաստով կարեւոր է Ֆրանսիայի նախագահի գրասենյակի հայտարարությունը, որտեղ Իսրայելի դեմ Իրանի հրթիռային հարձակումը ենթարկված է սուր քննադատության: Ելիսեյան պալատը միաժամանակ Իսրայելին «խնդրել է հնարավորինս սեղմ ժամկետում դադարեցնել ռազմագործողությունները»:
Եվրոպացի գործընկերների հետ հեռախոսազրույցներում Իրանի արտաքին գործերի նախարարը հատուկ կարեւորել է Թեհրանում ՀԱՄԱՍ-ի քաղաքական առաջնորդ Հանիայի սպանությունից հետո Իրանի ցուցաբերած զսպվածությունը եւ այդ ֆոնին Իսրայելի կողմից նոր լարվածության հրահրումը:
Ակնարկը պարզ է. Իսրայելն Իրանի զսպվածությունը վերագրել է նրա թուլությանը եւ ավելի ազատ գործելու իրավունք վերապահել իրեն, ինչն արդեն սպառնալիք է ԻԻՀ տարածաշրջանային եւ միջազգային հեղինակությանը:
Հոկտեմբերի 1-ի հրթիռային հարվածներով Իրանը հասկացրել է, որ աշխարհաքաղաքական կարեւորության հարցերում ոչ մի զիջման չի գնա:
Չափազանց արտառոց է, որ ֆորմալ առումով հանդիսանալով Իրանի ռազմավարական գործընկեր, Ռուսաստանն առայժմ չի արձագանքել ստեղծված իրավիճակին, ռուսաստանցի եւ իրանցի պաշտոնյաների միջեւ առայժմ որեւէ շփման մասին տեղեկություններ չկան:
Թիվ 1 սյունակ, Վահրամ Աթանեսյան
