Կոռուպցիայի կանխարգելման հանձնաժողովի նախագահի պաշտոնի համար 2 թեկնածու առաջադրվեց

Կոռուպցիայի կանխարգելման նորաստեղծ հանձնաժողովի այսօրվա առաջին նիստում ընտրվելու է հանձնաժողովի նախագահը՝ 5 անդամների շարքից՝ հանձնաժողովի աշխատանքները համակարգելու նպատակով։ Այսօրվա նիստում առաջադրվեց երկու թեկնածու․

• Հայկուհի Հարությունյան (որպես ԿԿՀ անդամ առաջադրվել է ԱԺ ԼՀԿ խմբակցությունից),
• Էդգար Շաթինյան (որպես ԿԿՀ անդամ առաջադրվել է ԱԺ «Իմ քայլը» խմբակցությունից)։

Ընտրությունից առաջ թեկնածուները ելույթներ են ունենում, ինչից հետո տեղի է ունենալու քվեարկությունը։ Այն լինելու է հետևյալ ընթացակարգով՝ թեկնածուներից յուրաքանչյուրի համար լինելու է առանձին և բաց քվեարկություն՝ կողմ կամ դեմ։ Իրենք՝ թեկնածուները, չեն մասնակցելու իրենց համար կատարվող քվեարկությանը։

Երկու թեկնածուների օգտին քվեարկություններից հետո նիստը նախագահողը հայտարարելու է թեկնածուների օգտին տրված քվեները, և նրանցից ավելի շատ կողմ ձայներ ստացածը դառնալու է ԿԿՀ նախագահ։ Այդ թեկնածուն պետք է հավաքած լինի առնվազն 3 կողմ ձայն։