Ալիեւը խժռում է քառասունչորսօրյա պատերազմի «հերոսներին»

Ադրբեջանի ԶՈՒ բանակային երկրորդ կորպուսի հրամանատար Մաիս Բարխուդարովը հաստատել է իր պաշտոնանկության մասին ոչ պաշտոնական տեղեկատվությունը: «Որոշումն ընդունված է, ներկայումս գտնվում եմ ՊՆ կարգադրության տակ»-ասել է նա: Բարխուդարովը նոր նշանակման մասին տեղեկություն չունի, իսկ դա նշանակում է, որ նրան գործող բանակից հեռացրել են: Քառասունչորսօրյա պատերազմում ադրբեջանական զինվորականության մասին տարածված առասպելներից մեկի հերոսն էլ Մաիս Բարխուդարովն էր: Ոմանք գտնում էին, որ նա բարձր նշանակում կստանա ՊՆ-ում կամ ԶՈՒ ԳՇ-ում: Ըստ երեւույթին, այդ առասպելները Բարխուդարովին այնքան են ոգեւորել, որ նա «հաջողություններից գլխապտույտ է ունեցել»: Մաիս Բարխուդարովը վատահամբավ անուն ունի՝ կապված ապրիլյան քառօրյա պատերազմից հետո նրա հրամանատարության զորամասում տեղի ունեցած ինքնադատաստանի հետ: Ըստ մամուլի բազմաթիվ վկայությունների, կորպուսի շտաբի պետը ծառայողական ատրճանակի կրակոցով սպանել է ժամկետային ծառայության շարքային զինվորի: Հրամանն արձակել է Բարխուդարովը: Շարքային զինվորը կասկածվել է «հայերի հետ ունեցած կապերի մեջ»: Այդ գործով դատաքննությունը դեռեւս ավարտված չէ: Բաքվի զինվորական դատարանում մի քանի անգամ բարձրացվել է Բարխուդարովին գործով որպես վկա հարցաքննելու պահանջ: Երեւում է, Բարխուդարովի հեռացումը հետապնդում է բանակում կատարված հանցագործությունները նրան մեղսագրելու նպատակ: Նա բացում է շարքը: Անկասկած լինելու են նաեւ այլ «քամուց քշվածներ»: