Թուրքիայում քրդական հարցի շուրջ քննարկումները շարունակվում են:
Աղբյուրները հաղորդում են, որ խնդիրը «կառավարող կուսակցության վերնախավում ներքին բանավեճի տեղիք է տվել»:
Ինչպես հայտնի է, Թուրքիայի Ազգայնական շարժում կուսակցության առաջնորդ Դեւլեթ Բահչելին առաջարկել է «ներում շնորհել» ցմահ ազատազրկման դատապարտված Քրդական բանվորական կուսակցության առաջնորդ Աբդուլլա Օջալանին, որպեսզի վերջինս խորհրդարանի ամբիոնից հայտարարի ՔԲԿ-ն լուծարելու եւ զինված պայքարը դադարեցնելու մասին:
Բահչելիի առաջարկությունն անուղղակիորեն պաշտպանել է նախագահ Էրդողանը: Նա հռչակել է «Թուրքիան առանց ահաբեկչության» քաղաքական ուղեգիծ:
Թուրքիայի զինված ուժերը եւ հատուկ ծառայություններն Անկարայի ահաբեկչությունից հետո զանգվածային հարվածներ են հասցնում Իրաքի եւ Սիրիայի հյուսիսում քրդական զինված շարժման հենակետերին:
Թուրքիայում քրդական շարժման նկատմամբ անհանդուրժողականությունը գրեթե մեկ դարի պատմություն ունի:
Աշխարհաքաղաքական նոր իրավիճակում, սակայն, Էրդողանը փորձում է միջազգային տպավորություն ստեղծել, որ քրդերի հետ երկխոսության պատրաստ է, բայց՝ միայն քաղաքական հարթակում: Հակառակ դեպքում ՔԲԿ-ն եւ նրա ռազմական կազմավորումները ոչնչացման ենթակա են:
Հոկտեմբերի 28-ին Թուրքիայի կառավարությունը նիստ է գումարել, որտեղ քննության են առնվել աշխարհում եւ տարածաշրջանում իրավիճակի հետ կապված հարցեր:
Ըստ պաշտոնական հաղորդագրության՝ Էրդողանը խոսել է նաեւ հայ-ադրբեջանական կարգավորման մասին:
Նա ընդգծել է, որ Հայաստանը եւ Ադրբեջանը խաղաղություն հաստատելու «անկեղծ ջանքեր են գործադրում»:
Թուրքիան, Էրդողանի ձեւակերպմամբ՝ «ուշադիր հետեւում է» եւ «կշարունակի աշխատել՝ ադրբեջանցի եղբայրների հետ կոորդինացիայով»:
Մերձավոր Արեւելքում մի շարք մարտահրավերների բախվող Թուրքիան, որ լարված հարաբերություններ ունի նաեւ Իրանի հետ, ակնհայտորեն ձգտում է հայ-ադրբեջանական կարգավորման հնարավորությունը ծառայեցնել իր միջազգային իմիջին:
Մի կողմից Անկարայի այդ կեցվածքը կարող է դրական ազդեցություն թողնել հայ-ադրբեջանական բանակցությունների վրա, մյուս կողմից, սակայն, Թուրքիայի ակտիվ միջամտությունը, թերեւս, հարուցում է աշխարհաքաղաքական ազդեցիկ դերակատարների հակազդեցությունը:
Այս առումով ցուցիչ կլինի Հայաստանի հետ սահմանի բացման նկատմամբ Էրդողանի կառավարության գործնական մոտեցումը:
Թուրքիայի հետ շփումներում Հայաստանի հատուկ բանագնաց Ռուբինյանը վերջերս ասել է, որ սպասվում է հայ-թուրքական միջգերատեսչական հանդիպում:
Եթե Էրդողանին հաջողվի քրդական հարցում ներքին համախմբում ձեւավորել եւ քաղաքական գործընթաց սկսել, դա, անկասկած, իր ազդեցությունը կունենա նաեւ Թուրքիայի արտաքին քաղաքականության, այդ թվում՝ Հայաստանի հետ հարաբերությունների կարգավորման գործընթացի վրա: Բայց որքանո՞վ է Էրդողանը քրդական հարցի քաղաքական կարգավորման ձգտումներում անկեղծ՝ գերխնդիրը դա է:
Թիվ 1 սյունակ, Վահրամ Աթանեսյան
