Թեհրանը դեռ մտադիր չէ երկխոսություն վարել Թրամփի հետ. Աբբաս Արաղչի

Իրանի իշխանությունները մտադիր չեն երկխոսություն վարել ԱՄՆ նորընտիր նախագահ Դոնալդ Թրամփի հետ, քանի դեռ Վաշինգտոնի նոր վարչակազմը հստակ չի մշակել իր քաղաքականությունը։ Այս մասին Al Araby Al Jadeed-ին տված հարցազրույցում հայտարարել է Իրանի Իսլամական Հանրապետության արտաքին գործերի նախարար Աբբաս Արաղչին։

«Այս պահին մենք մտադիր չենք երկխոսության գնալ, քանի որ նման երկխոսության հիմք չկա: Պետք է սպասենք, թե ինչպես կձևակերպի ամերիկյան նոր վարչակազմն իր քաղաքականությունը և կիրականացնի այն, իսկ հետո մենք կձևակերպենք մեր քաղաքականությունը», – ասել է Արաղչին՝ Թրամփի նախագահական 2-րդ ժամկետում Իրանի մտադրության մասին հարցին ի պատասխան։

2018-ին Թրամփը ԱՄՆ-ը դուրս բերեց Գործողությունների համատեղ համապարփակ ծրագրից, որը 2015-ին Իրանի հետ ստորագրվել էր ՄԱԿ-ի Անվտանգության խորհրդի մշտական ​​հնգյակի և Գերմանիայի կողմից՝ միջուկային զարգացումների շուրջ ստեղծված ճգնաժամը լուծելու համար:
2021 թ.-ի ապրիլից Ռուսաստանը, Չինաստանը, Միացյալ Նահանգները, Մեծ Բրիտանիան, Գերմանիան և Ֆրանսիան բանակցություններ են վարում Իրանի հետ՝ վերականգնելու գործարքը։

Ի պատասխան Գործողությունների համատեղ համապարփակ ծրագրից ԱՄՆ-ի դուրս գալուն, Իրանի խորհրդարանը 2020 թ.-ին ընդունել է «Պատժամիջոցները վերացնելու և Իրանի ժողովրդի շահերը պաշտպանելու ռազմավարական գործողությունների մասին» օրենքը։ Դրան համապատասխան՝ Թեհրանը կրճատել է միջուկային համաձայնագրով նախատեսված մի շարք պարտավորություններ, այդ թվում՝ դադարեցրել Ատոմային էներգիայի միջազգային գործակալության ստուգումները։