Խորհրդարանական ընտրությունների մոտենալու հետ նոր թափ է հավաքում ատելության արշավը

Թաթուլ Հակոբյանը գրել է.

«Քոչարյանն ու Սերժը Հոկտեմբերի 27-ի ոճիրի, Նիկոլ Փաշինյանն ու Արցախի ղեկավարները 2020-ի աղետի ու 2023-ի արհավիրքի պատասխանատուներ։

Խորհրդարանական ընտրությունների մոտենալու հետ Հայաստանում նոր թափ է հավաքում ատելության արշավն ու ընտրողական հակաքարոզչությունը:

Իշխանական և ընդդիմադիր շրջանակների տեսակետներն արտահայտող քարոզիչները վերցնում են նաև ԱՆԻ կենտրոնի և իմ հրապարակումները, ավելի ճիշտ՝ այդ հրապարակումների իրենց հաճելի հատվածներն և դրանցով հարվածում միմյանց:

Ես որևէ բան չեմ կարող անել, բացի խնդրանքն ու հորդորը՝ իմ և ԱՆԻ կենտրոնի նյութերը չօգտագործել մասնակի և ընտրողաբար:

Հիմնականում օգտագործվում է երկու պատում՝ Հոկտեմբերի 27-ի ոճիր ու Մեղրիի տարբերակ և Արցախի պարտություն ու հայաթափում:

Եթե Ձեզ, երկու կողմերիդ, հետաքրքրում է իմ կարծիքը (վստահ եմ՝ հետաքրքրում է միայն իմ ուսումնասիրությունները մասնակի և ընտրողաբար Ձեր հակառակորդի դեմ օգտագործելը), ապա այն վաղուց հայտնի: Կրկնեմ այն մեկ անգամ ևս՝

ա/ Հոկտեմբերի 27-ի ոճիրի հիմնական պատասխանատվությունն ու մեղքը կրում են Ռոբերտ Քոչարյանն ու Սերժ Սարգսյանը, քանի որ նրանց իշխանության ժամանակ է դա տեղի ունեցել, նրանք են կրում նաև 1998 թվականի հանցավոր ռազմապետական հեղաշրջման պատասխանատվությունը,

բ/ Արցախի աղետի ու արհավիրքի հիմնական պատասխանատվությունն ու մեղքը կրում են Նիկոլ Փաշինյանն ու Արցախի ռազմաքաղաքական ղեկավարները, քանի որ նրանց ժամանակ է դա տեղի ունեցել:

Այսքանը:

Եւ վերջում, պետք է հիշեցնել Վանո Սիրադեղյանի մարգարեական խոսքերը՝ հնչեցված 1999 թվականի մայիսի 27-ին՝ «Պարտություն չկա, բայց ես պատկերացնում եմ ինչ մղձավանջ է սկսելու մեղավորներ որոնելու, երբ, Աստված չտա, բուն պարտությունը լինի»:

Թաթուլ Հակոբյան 5 հունվարի, 2025թ, ԴովեղՀ. Գ. Տարածելը խրախուսվում է»։