ԱՄՆ պատվիրակությունը Կիևում է

ԱՄՆ Ազգային անվտանգության խորհրդի (ԱԱԽ) պատվիրակությունը ժամանել է Ուկրաինայի մայրաքաղաք Կիև։ Այս մասին հայտնում է Ուկրաինայի պաշտպանության նախարարության կայքը։

Պատվիրակությունը գլխավորում է Ուինֆիլդ Սուոնթոնը, ով ԱԱԽ-ում պատասխանատու է ուկրաինական ուղղության համար։ Հանդիպման հիմնական թեմաներից մեկը 2024 թվականին Ուկրաինային ԱՄՆ-ի կողմից տրամադրված օգնության արդյունքների քննարկումն է և 2025 թվականին պաշտպանության նախարարությունների թիմերի միջև փոխգործակցության պլանավորումը։ Կողմերը քննարկել են ուկրաինական անօդաչուների արտադրության մեջ ավելի վաղ հայտարարված ներդրումների կարգավիճակը և պաշտպանական արդյունաբերության ոլորտում այլ համատեղ նախագծերի զարգացումը։

«Առանձնահատուկ ուշադրություն է դարձվել ԱՄՆ հետագա օգնությանը սպառազինության և զինամթերքի որոշ տեսակների կապակցությամբ։ Նաև համաժամանակեցրել ենք մեր դիրքորոշումները ուկրաինական կարիքների և ամերիկյան հնարավորությունների հարցում»,- նշել են գերատեսչությունում։

ԱՄՆ պատվիրակությունն այցելել է Կիև հունվարի 9-ին նախատեսված արևմտյան երկրների խմբի 25-րդ նիստի նախօրեին՝ Գերմանիայի Ռամշտայն ավիաբազայում Ուկրաինային սպառազինության մատակարարումը համակարգելու հարցով։