Ինչու են տղաները խուսափում բանակից. ՄԻՊ-ը` զինված ուժերում տիրող բարքերի մասին

Բանակում ծառայելուց խուսափելը պայմանավորված է ոչ միայն դեֆորմացված մտածողությամբ, այլ նաև զինված ուժերում տիրող բարքերով։ Կառավարության նիստից հետո լրագրողների հետ զրույցում նման տեսակետ հայտնեց Հայաստանի մարդու իրավունքների պաշտպան Անահիտ Մանասյանը։

Պաշտպանը նշեց, որ կառավարության նիստում բոլորը խոսեցին քաղաքացիների պարտականությունների մասին, բայց պետք է խոսել նաև պետության պարտականությունների մասին:

«Այո, միանշանակ պետք է քաղաքացիների պարտականության վերաբերյալ խոսել և խոսել հանրային իրազեկումների կրթության մասին, բայց միանշանակ պետք է խոսել նաև պետության պարտավորության մասին՝ բացառելու այս դեպքերը: Մենք այս առումով գուցե որոշակի զարգացումներ ունենք, բայց ես համարում եմ, որ այս առումով մենք ունենք նաև շատ խնդրահարույց թերություններ, և դրանց զարգացման ուղղությամբ պետք է լուրջ աշխատանքներ իրականացնենք: Այսինքն՝ դեֆորմացիաների պատճառները կարող են տարբեր լինել, բայց պետությունը իր պարտավորությունները պետք է անմիջականորեն կատարի»,- նշեց Անահիտ Մանասյանը: