ԵՄ-ը հետաքրքրված է «Խաղաղության խաչմերուկով». Ուշակովս

«Հուսով եմ, որ դուք կարող եք տեսնել, որ Եվրոպական խորհրդարանը լի է վճռականությամբ՝ էլ ավելի խորացնելու կապերը», – հայտարարել է ԵՄ-Հայաստան խորհրդարանական գործընկերության կոմիտեի համանախագահ Նիլս Ուշակովսը՝ ԵՄ-Հայաստան խորհրդարանական գործընկերության կոմիտեի 4-րդ նիստի ժամանակ։

Նրա խոսքով՝ ճշմարտությունն այն է, որ Հայաստանն ու ԵՄ-ն երբեք այսքան սերտ հարաբերություններ չեն ունեցել. «Մեր հարաբերությունները հիմնված են ամուր հիմքերի և հանձնառությունների վրա։ Մենք հավատում ենք ժողովուրդների ու պետությունների իրավունքին՝ ընտրելու իրենց ապագան։ Եվրոպական խորհրդարանն արդեն հստակ արտահայտվել է, որ աջակցում է հարաբերությունների զարգացմանն ու խորացմանը, բայց ամեն ինչ կախված է Հայաստանից, թե ինչպիսի հարաբերություններ է ձգտում ունենալ»։

Ըստ Ուշակովսի՝ շատ կարևոր է, որ Հարավային Կովկասում զարգացվի նաև անվտանգային համագործակցությունը․

«ԵՄ քաղաքացիական առաքելությունը օգնել է կայունացնել իրավիճակը Հայաստան-Ադրբեջան սահմանին։ Իհարկե, Բաքուն և Մոսկվան թիրախավորում են այս առաքելությունը և մեղադրանքներ ներկայացնում, բայց հարց է առաջանում՝ չզինված քաղաքացիական առաքելությունն ի՞նչ սպառնալիք կարող է ներկայացնել։ Շատ կարևոր է հասկանալ, որ Բաքուն մերժում է այս համագործակցությունը և ցանկանում է դադարեցնել ԵՄ առաքելությունը Հայաստանում։ Բայց Հայաստանը ներկայացրել է առաջարկ՝ փոխադարձ զինամթերքի վերահսկողության մեխանիզմների վերաբերյալ, և սա օրինակ է, որ Հայաստանն ինքնին հանձն է առել խաղաղության օրակարգին, և մենք դա աջակցում ենք։ Իսկ Ադրբեջանի արձագանքն այս ամենին շատ դժվար է հասկանալ և մեկնաբանել», – ասաց նա՝ հավելելով, որ ԵՄ-ն հետաքրքրված է նաև Հայաստանի նախաձեռնած «Խաղաղության խաչմերուկով», որը շատ կարևոր է տարածաշրջանի կապերի և հաղորդակցությունների բացման համար։