Բազմազգ Հայաստանը նախընտրելի է միատարր Հայաստանից

Լրագրող Թաթուլ Հակոբյանը «Ֆեյսբուք»-ի իր էջում գրել է.

Թարմ ուղեղով՝ դառը սուրճի հետ

Հայաստանը այսօր տնտեսապես այնպիսի վիճակում է, որ ի վիճակի է օդանավեր ուղարկել (մենք ազգային ավիափոխադրող չունենք, բայց դա ամենահեշտ լուծվող մասն է) և տարհանել Սիրիայի՝ ալավիներով բնակեցված շրջաններում բնակվող հայերին և ընդհանրապես այն սիրիահայերին, ովքեր ցանկություն կունենան հեռանալ իրենց պետությունից:

Այլ հարց է՝ արդյոք սիրիահայերը ուզում են թողնել իրենց տուուտեղը, իրենց պետությունը և հեռանալ Հայաստան, հետո կորոշեն՝ մնալ մեր երկրում կամ գնալ երրորդ պետություն:

Պետք է նաև նրբանկատ լինել Սիրիայի իշխանությունների կեցվածքի հարցում:

Սիրիահայության և ընդհանրապես Միջին Արևելքի քրիստոնյաների ապագան քննարկման թեմա է դառնում ամեն անգամ, երբ տեղի է ունենում կոտորած, քաղաքացիական կամ ազգամիջյան պատերազմ:

Ամեն դեպքում Հայաստանը, որպես հայության միակ հայրենիք, պետք է պատրաստակամոսւթյուն հայտնի օգնել մեր հանրապետությունից դուրս գտնվող և անել վիճակում հայտնված հայերին:

Հայաստանի հնարավորությունները սահմանափակ են, բայց կարևոր է ցանկությունը և պատասխանատվությունը:

Մեր երկիրը առանց այն էլ ունի բնակչության կարիք:

Այդ բացը լրացնելու համար մենք պետք է դիտարկենք սփյուռքահայությանը առաջին հերթին, բայց նաև Արևելքի քրիստոնյաներին, ինչու ոչ՝ այլ ազգերի:

Սիրիահայերի արդեն իսկ ներկայությունը Հայաստանում շատ բան է փոխել, պատկերացրեք, թե ինչքան կփոխվի մեր երկիրը, դրական իմաստով, եթե ունենանք սփյուռքահայ տարբեր հատվածների ավելի լայն շերտեր, այլ ազգերի ներկայացուցիչներ՝ ռուսներ, իրանցիներ, հնդիկներ…

Բազմազգ Հայաստանը նախընտրելի է միատարր Հայաստանից:

Հայաստանի ուժը նաև բազմազանության մեջ է: