Վերջին տարիներին գրանցված դեղերի թիվը նկատելիորեն նվազել է

Այսօր Ազգային ժողովում առողջապահության հարցերի մշտական հանձնաժողովի նախաձեռնությամբ կայացավ աշխատանքային քննարկում՝ դեղերի պետական գրանցման գործընթացի, առկա խնդիրների և դրանց լուծման ուղիների վերաբերյալ։

«Վերջին տարիներին գրանցված դեղերի թիվը նկատելիորեն նվազել է և այս իրավիճակով պայմանավորված՝ նախաձեռնվեց քննարկումը՝ ոլորտի մասնագետների մասնակցությամբ։

Քննարկմանը ներկա էին առողջապահության նախարարը, Անկախ դեղատների ասոցիացիայի ղեկավարը, Առողջապահական և աշխատանքի տեսչական մարմնի ղեկավարը ինչպես նաև դեղագործական ու դեղերի ներմուծմամբ զբաղվող ընկերությունների ներկայացուցիչներ և ոլորտի այլ շահագրգիռ կողմեր։

Հանդիպման ընթացքում անդրադարձ կատարվեց դեղերի գրանցման գործընթացում առկա հիմնական խոչընդոտներին։ Մասնակիցները ներկայացրին իրենց առաջարկները՝ ուղղված գործընթացների պարզեցմանը, դեղերի մատակարարման շղթայի բարելավմանը, ինչպես նաև պետության և մասնավոր հատվածի միջև համագործակցության առավել արդյունավետ կազմակերպմանը։

Քննարկման արդյունքում օրենսդրական և ենթաօրենսդրական իրավական ակտերի փոփոխություններ կնախաձեռնվեն՝ առկա իրավիճակը բարելավելու համար»,- հայտնել է ԱԺ առողջապահության հարցերի մշտական հանձնաժողովի նախագահ Արսեն Թորոսյանը։