Ուկրաինայի արտաքին գործերի նախարար Սիգիբան հերքել է տեղեկությունը, որ ապրիլի 15-ին Անկարայում ռուս-ուկրաինական հանդիպում է նախատեսված: «Այդպիսի պայմանավորվածություն չկա»,- հայտարարել է նա:
Մամուլում մինչ այդ տեղեկություն է հայտնվել, որ Թուրքիայի մայրաքաղաքում Ռուսաստանի եւ Ուկրաինայի պատվիրակությունները «կքննարկեն Սեւ ծովում առեւտրային նավագնացությունը վերսկսելու հետ կապված տեխնիկական հարցերը»:
Իր հերթին ԱՄՆ նախագահի հատուկ ներկայացուցիչ գեներալ Քելոգը սոցիալական X հարթակում գրառում է կատարել եւ պարզաբանել, որ բրիտանական Yhe Times պարբերականը խեղաթյուրել է իր հարցազրույցը, ինքը չի ասել, որ Ուկրաինան «պետք է բաժանվի ազդեցության գոտիների»:
Ռուսաստանյան «Նեզավիսիմայա գազետան», հղում անելով Վաշինգտոնի դիվանագիտական աղբյուրներին, հայտնում է, որ ապրիլի 11-ին Սպիտակ տանը կայացել է խորհրդակցություն, որի ընթացքում Քելոգը եւ ԱՄՆ նախագահի մյուս հատուկ ներկայացուցիչ Ուիթկոֆը «սուր վիճաբանություն են ունեցել»:
Ըստ այդմ, Ուիթկոֆն առաջարկել է, որ Միացյալ Նահանգները պետք է ընդունի ուկրաինական չորս մարզերի՝ Դոնեցկի, Լուգանսկի, Խերսոնի եւ Զապորոժիեի ռուսաստանապատկանությունը, որպեսզի «պատերազմը կանգ առնի»: Քելոգն, ընդհակառակը, պնդել է, որ հրադադար պետք է հաստատվի զորքերի շփման ներկայիս գծով, իսկ եվրոպական խաղաղապահ ուժերը՝ տեղաբաշխվեն ուկրաինական զորքերի թիկունքում: Քելոգը համարում է, որ տարածքների պատկանելիության հարցը «քաղաքական բանակցությունների առարկա է»:
Վաշինգտոնի դիվանագիտական աղբյուրը «Նյու-Յորք թայմսին» ասել է, որ քննարկման արդյունքներով նախագահ Թրամփը «որոշում չի կայացրել», եւ նրա հատուկ ներկայացուցիչ Ուիթկոֆը, Սանկտ-Պետերբուրգում հանդիպելով Ռուսաստանի նախագահ Վլադիմիր Պուտինին, «որեւէ հստակ ազդակ չի փոխանցել»:
Այս տեղեկությունը, հավանաբար, իրականությանը մոտ է: Պուտին-Ուիթկոֆ հանդիպումից հետո Կրեմլի խոսնակ Պեսկոպը Պավել Զարուբինին տված հարցազրույցում խոստովանել է, որ ամերիկյան կողմի հետ բանակցությւոններում «սույնրոպեական ճեղքման չպետք է սպասել»: Նա, իհարկե, դա բացատրել է դեմոկրատական վարչակազմի կողմից հարաբերությունները «զրոյական մակարդակի հասցնելու հետ կապված բարդություններով», բայց, երեւում է, առաջիկայում Թրամփ-Պուտին շփումներ նախատեսված չեն:
«Ինչ-որ ժամանակ այդ գագաթաժողովը կկայանա, եւ մենք ներկայումս աշխատում ենք այդ ուղղությամբ»,- ասել է Պեսկովը:
«Ինչ-որ ժամանակ» ասվածը շատ անորոշ հասկացություն է: ԱՄՆ եւ Ռուսաստանի նախագահների հանդիպումն, իհարկե, կազմակերպչական եւ այլ, այդ թվում՝ տեխնիկական, բնույթի հսկայական աշխատանք է պահանջում, բայց ամեն ինչ կախված է սկզբունքային պայմանավորվածություններից: Եթե Ուկրաինան եւ Ռուսաստանը պատրաստ չեն քննարկել անգամ առեւտրային նավագնացության հետ կապված տեխնիկական հարցերը, ապա պարզ է, թե որքան հակոտնյա են տարածքների պատկանելիության հարցում դիրքորոշումները:
Հավանաբար քաղաքական այդ «ստագնացիայով» է պայմանավորված, որ Ռուսաստանն ապրիլի 13-ին հրթիռակոծել է Սումին, իսկ Խերսոնը եւ Օդեսան ենթարկվել են ԱԹՍ-երի հարձակման: Սումիի հրթիռակոծման հետեւանքով զոհվել է 34 խաղաղ բնակիչ, այդ թվում՝ երկու երախա, ավելի քան 100 մարդ վիրավորվել է: Այդ առթիվ ԱՄՆ պետքարտուղար Ռուբիոն թեեւ ցավակցություն է հայտնել զոհվածների հարազատներին, բայց թույլ է տվել ձեւակերպել, որ «դա այն ողբերգությունն է, որ նախագահ Թրամփը փորձում է կանխել»: Դա, ըստ էության, կարելի է հասկանալ որպես Կիեւի հասցեին ոչ միայն կշտամբանք, այլեւ՝ սպառնալիք, որ նման հրթիռակոծումները կարող են կրկնվել:
Արդյոք Ուկրաինան վերջին պահին հրաժարվե՞լ է Անկարայում Ռուսաստանի հետ բանակցությունից, եւ Մոսկվան այդ պատճառով է բարբարոսական հրթիռակոծման ենթարկել Սումին, թե Վլադիմիր Պուտինն այդ բոլոր առումներով անմարդկային քայլին է դիմել, որպեսզի Վաշինգտոնը Կիեւի նկատմամբ հավելյալ ճնշու՞մ գործադրի: Եթե պայմանականություններից վերացարկվենք, ապա պետք է արձանագրենք, որ ստեղծված փակուղային իրավիճակում ավելի շատ Թրամփն ունի Պուտինի աջակցության կարիքը: Իսկ դա կարող է մի դրսեւորում ունենալ՝ Ուկրաինայի դեմ ռազմական մեքենայի ամբողջ թափով գործարկումը: Միայն այդ, լիակատար կապիտուլյացիայի սպառնալիքի դեպքում, Կիեւը կհամաձայնի «ամեն գնով կրակի դադարեցման»: Թրամփը եւ Պուտինը համաձայնեցրե՞լ են այդ սցենարը: Ամերիկյան «ուղեղային կենտրոններից» մեկը հրապարակել է «նոր աշխարհակարգի քարտեզը», որտեղ Եվրոպան ներկված է կարմիր՝ իբրեւ Ռուսաստանի ազդեցության գոտի: Իսկ Հյուսիսային Ամերիկան եւ Գրենլանդիան կապույտ՝ ամերիկյան գույն ունեն:
Թիվ 1 սյունակ, Վահրամ Աթանեսյան
