Ի՞նչ իրավունք ունեք խոսելու բանակի մասին․ Սիմոնյանը` Քոչարյանին

ԱԺ նախագահ Ալեն Սիմոնյանը ֆեյսբուքյան եթերում անդրադառնալով ՀՀ երկրորդ նախագահ Ռոբերտ Քոչարյանի՝ Բանակի օրվան նվիրված ուղերձին, մասնավորապես ասել է․

«2000-2002թթ․ ես ծառայել եմ Ռոբերտ Քոչարյանի ասած այդ «մարտունակ և անկոտրում, հաղթական բանակում», և այն ինչ կատարվում էր բանակում Ռոբերտ Քոչարյանի կառավարման և Սերժ Սարգսյանի ՊՆ եղած ժամանակում, մի բառով կարելի է ասել՝ կատարյակ բարդակ․ կոտրված զինվորներ, մարտունակության մասին խոսել ընդհանրապես չի կարելի, զինվորները սոված էին, խմելու ջուր չկար, կար մեծ քանակությամբ կոռուպցիա. սպայական անձնակազմի 90 տոկոսը բանտապահի տրամաբանության մեջ էին՝ զինվորներին ստորացնելով, ցավեցնելով, ինքնահաստատվելով։

Սա՛ է եղել ձեր մարտունակ բանակը, էս ինչերի՞ց եք խոսում։ Որպես ՀՀ ԱԺ նախագահ՝ դիմում եմ նախագահի պաշտոնը զբաղեցրած Ռոբերտ Քոչարյանին, ի՞նչ իրավունք ունեք խոսելու բանակի մասին, դուք, ձեր շրջապատն է, որ 90-ականների այդ մարտունակ բանակը վերածել եք չկռվող, կոտրված, հայրենիքի նկատմամբ անվստահություն ունեցող մի կառույցի և կոռուպցիայի մի մեծ հիմնարկի»։