Վարչապետ Նիկոլ Փաշինյանն ասել է, որ այսօր Հայաստանի ու Ադրբեջանի միջև խաղաղություն է հաստատված, և պետք է արձանագրել, որ այն այժմ էլ ունի բավական ուժեղ իրավական հիմք։
«ՀՀ-ի և Ադրբեջանի միջև հաստատված խաղաղությունն ունի պարտադիր իրավական ուժ. նկատի ունեմ սահմանազատման հանձնաժողովների գործունեության կանոնակարգը, որը Հայաստանի և Ադրբեջանի միջև ստորագրված առաջին երկկողմ միջազգային պայմանագիրն է»,- նշել է նա՝ հավելելով, որ ՀՀ-ն հաղթահարել է իրեն պարտադրված գոյատևման և մաքառման օրակարգը։
Վարչապետի խոսքով՝ Հայաստանը մտել է սովորական կյանքով ապրելու պատմական դարաշրջան, որտեղ մեր առաքելությունը կրթվելն է. «Այսօր Կիրանցի դպրոցի աշակերտները Ադրբեջանից 50 մետր հեռավորության վրա դասի են գնում, 30 մետր հեռավորության վրա՝ ֆուտբոլ խաղում։ Խաղաղությունը սա՛ է։ Խաղաղությունը նաև այն է, որ ավելի քան երկու տարի է՝ Հայաստան-Ադրբեջան փոխհրաձգության հետևանքով ոչ զոհ ունենք, ոչ վիրավոր»,- ասել է նա:
