Նախատեսվում է դիվանագիտական գրասենյակի ստեղծման իրավակարգավորում, այսինքն՝ լինում են երկրներ, որտեղ ֆինանսական կամ այլ տեսանկյունից նպատակահարմար չէ բացել ամբողջական դեսպանություն, բայց կա անհրաժեշտություն դիվանագիտական ներկայացուցչություն ունենալու: Ըստ այդմ՝ առաջարկվում է նմանատիպ վայրերում հիմնել դիվանագիտական գրասենյակ, որի ղեկավարումը կիրականացնի այդ երկրում հավատարմագրված ՀՀ դեսպանը: Այդ մասին Ազգային ժողովի՝ մայիսի 11-ին գումարված արտահերթ նիստին ասաց ԱԳ նախարար Արարատ Միրզոյանը՝ առաջին ընթերցմամբ ներկայացնելով ««Դիվանագիտական ծառայության մասին» օրենքում փոփոխություն կատարելու մասին», ««Հանրային ծառայության մասին» օրենքում լրացում և փոփոխություն կատարելու մասին», ինչպես նաև ««Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություններ և լրացում կատարելու մասին» նախագծերը:
Առաջարկվում է վերանայել դեսպանների և մշտական ներկայացուցիչների պաշտոնավարման ժամկետները, ինչպես նաև դեսպանին հնարավորություն տալ՝ շարունակելու պաշտոնավարում հավատարմագրման երկրում առավելագույնը 5 տարի ժամկետով, որից հետո դեսպանը կարող է վերանշանակվել այլ երկրում, և այս դեպքում առաջարկվում է ծառայության առավելագույն ժամկետը դարձնել 8 տարի:
Նոր կարգավորման համաձայն՝ դիվանագետները ծառայությունից հետո պետք է վերադառնան Հայաստան և աշխատեն ԱԳՆ-ում, բայց այսուհետ ոչ թե 24 ամիս, այլ 18 ամիս, որից հետո կրկին իրավունք կունենան գործուղվելու օտարերկրյա պետություն: Գլխավոր հյուպատոսի համար էլ ՀՀ ԱԳՆ-ում աշխատելու ժամկետը սահմանվում է 18-ի փոխարեն 12 ամիս, իսկ օտարերկրյա պետությունում ծառայության ժամկետը՝ 2-ի փոխարեն 3 տարի:
Մեկ այլ կարգավորում վերաբերում է դիվանագետ ամուսինների աշխատավարձերին:
«Համակարգում կան դիվանագետ ամուսիններ, և ահա, երբ դիվանագետ ամուսինները գործուղվում են օտարերկրյա պետություն՝ ծառայության, նրանցից մեկը գործող կարգավորմամբ ստանում է աշխատավարձի ընդամենը 50 տոկոսը: Սա վաղուց իրեն սպառած և աբսուրդ կարգավորում է: Եթե երկու դիվանագետն էլ իրականացնում են 100 տոկոսով ծառայություն, աշխատանք, բավականին արդար է, որ երկուսն էլ վարձատրվեն իրենց հասանելիքի 100 տոկոսով»,- ասաց նախարարը:
Մեկ այլ փոփոխության համաձայն՝ առաջարկվում է օտարերկրյա պետությունում ծառայող դիվանագետների աշխատավարձը հավասարեցնել Երևանում իրենց ծառայությունն իրականացնող դիվանագետների աշխատավարձին: Այդ համատեքստում նախարարը առաջին քարտուղարի օրինակը բերեց: Օրինակ, Երևանում՝ ԱԳՆ-ում, դիվանագիտական ծառայություն իրականացնող դիվանագետը՝ առաջին քարտուղարը, ստանում է 267 հազար դրամից մինչև 366 հազար դրամ աշխատավարձ, մինչդեռ օտարերկրյա պետությունում ծառայող նույն առաջին քարտուղարի աշխատավարձը 157-178 հազար դրամ է, ինչը, ըստ Միրզոյանի, կտրուկ նվազեցնում է օտարերկրյա պետությունում ծառայության գրավչությունը:
