Հյուսիսային Կորեայում առաջին անգամ հնարավոր է տպագրվի «Հարրի Փոթեր»-ը՝ Բրիտանիայում տպագրվելուց 23 տարի անց։ Պետական «Գրական թերթ»-ը հրապարակել է հոդված, որտեղ դրական եզրակացություն է տրվում Ջոան Ռոուլինգի աշխարհահռչակ ստեղծագործությանը։ Հոդվածի հեղինակը նշել է, որ Հարրի Փոթերը դրական է անդրադառնում երեխաների վրա, սովորեցնելով նրանց, որ սեփական ուղին պետք է հարթել սեփական ուժերով ու հնարավորություններով։
Ինչպես նշում է The Daily Mail-ը Հյուսիսային Կորեայում որևէ գիրք տպագրվելուց առաջ այն պետք է ստանա գրողների ալյանսի ու Կորեայի աշխատավորների կուսակցության համաձայնությունը։ «Գրական թերթ»-ը գրողների ալյանսի պաշտոնական աղբյուրն է, հետևաբար դրական եզրակացություն ստանալով երկրում այլևս հնարավոր է հանրահայտ գրքի հրատարակումը։
