Ինչպե՞ս արդյունավետ կառավարել ժամանակը․ խորհուրդներ Իլոն Մասքից

Իլոն Մասքի ապրելակերպը կարող է շատ հարցեր առաջացնել, բայց մեկ բան հաստատ է․ էքսցենտրիկ գյուտարարն իր գործերն էֆֆեկտիվ է կառավարում։ Ինչպե՞ս է նրան հաջողվում միաժամանակ մի քանի գործ գլխի բերել։ Ահա մի քանի մեթոդները, որոնց մասին կիսվել է անձամբ նա։

Առաջնահերթությունների սահմանում

Որքան էլ պարզունակ թվա, այնուամենայնիվ աշխատանքային պրոցեսի կարևոր բաղադրիչներից է առաջնահերթությունների սահմանումն ու բազմաթիվ խնդիրներից առաջնայինի առանձնացումը։ Իր հիմնական առաքելությանը՝ արտադրությանն ու ինժեներական լուծումներին Մասքը տրամադրում է իր աշխատանքի ժամանակի 80%-ը և միայն 20%-ն է հատկացնում մեդիա ու բիզնես գործընկերների հետ շփմանն ու ադմինիստրատիվ հարցերին։

5 րոպեանոց պլանավորում

Ահա մի հնարք, որը կթողնի կենտրոնանալ գլխավորի վրա։ Իլոն Մասքի ողջ օրը պլանավորված է 5 րոպեի ճշտությամբ։ Գյուտարարն իր աշխատանքը բաժանում է 5 րոպեանոց մասերի՝ յուրաքանչյուր հարցին հատկացնելով հենց այդքան ժամանակ։

Աշխատանքի «փաթեթավորում»

5 րոպեանոց պլանավորմանը զուգընթաց Մասքը կիրառում է “փաթեթավորման” մեթոդը (batching): Միասին է խմբավորում բոլոր այն խնդիրները, որոնք հնարավոր է լուծել միաժամանակ։ Նամակներին կարելի է պատասխանել նախաճաշի ժամանակ, հնարավոր գաղափարները կարելի է թելադրել աշխատանքի գնալու ճանապարհին։

Նպատակներին արագ մոտեցում

Եթե կոնկրետ գործի համար հատկացնես կարճ ժամանակահատված, ապա հնարավոր է այն լուծես ավելի արագ ու ժամանակ խնայես հաջորդ աշխատանքի համար։ Հենց այդ պատճառով էլ Իլոն Մասքը փորձում է կարևոր խնդրներին անդրադառնալ հնարավորինս կարճ ժամանակահատվածում։

Հանդիպումների կրճատում

Մասքը ընդհանրապես չի սիրում երկար աշխատանքային հանդիպումներն ու փորձում է դրանք կրճատել։ Ըստ նրա պետք չէ մասնակացել բազմամարդ քննարկումների, եթե լիարժեք վստահ չեք դրա արդյունավետության վրա։ Իսկ եթե այնուամենայնիվ նման քննարկումներն անխուսափելի են, ապա հնարավորինս քիչ ժամանակով ներկա գտնվեք։ Պետք չէ կազմակերպել շատ հանդիպումներ, հարցերի հիմնական մասը կարելի է լուծել տեքստային հաղորդագրության միջոցով։ Եթե որևէ հանդիպում կորցրել է իր կարևորությունը, անհրաժեշտ է ուղղակի հեռանալ։ «Հեռանալը կոպիտ չէ, կոպիտ է ստիպել որևէ մեկին կորցնել իր թանկ ժամանակը»։