Անկարան ցավակցություն է հայտնել «եղբայրական» Ադրբեջանին

Թուրքիայի արտաքին գործերի նախարարությունը արձագանքել է հայ-ադրբեջանական սահմանային բախումներին՝ փոխանցում է ermenihaber.am-ը։

Տարածված հաղորդագրության մեջ Թուրքիայի ԱԳՆ-ն դատապարտել է հայկական կողմի «ագրեսիվ ազգայնամոլական գաղափարների նոր դրսևորումները»։ Նշվում է, որ նման գործողություններով Հայաստանը ցանկանում է միջազգային հանրության ուշադրությունը շեղել «Ադրբեջանի տարածք ԼՂ-ի և շրջակա տարածքների ապօրինի բռնազավթումից» և փորձում է, հակամարտությանը նոր չափորոշիչներ ավելացնելով, արգելափակել հիմնախնդրի քաղաքական լուծումը։

«Հայկական կողմը պետք է հրաժարվի նմանատիպ վտանգավոր մարտավարությունից, պետք է ընտրի ողջախոհությունը և իրավական ճանապարհը։ Սեփական կարողությունները գերազանցող նպատակների համար արկածախնդրության դիմելը ցույց է տալիս, որ Հայաստանը հանդիսանում է ամենամեծ խոչընդոտը մեր տարածաշրջանում խաղաղության և կայունության համար»,- ասված է հաղորդագրության մեջ։

Պաշտոնական Անկարան ցավակցություն է հայտնել «բարեկամ և եղբայր» Ադրբեջանի ժողովրդին ու կառավարությանը՝ ադրբեջանական կորուստների կապակցությամբ և շուտափույթ ապաքինում մաղթել վիրավորներին։