Թուրքիան ահաբեկիչներ է տեղափոխում Ադրբեջան

Վերջին տարիներին Թուրքիայի կողմից հնչող յուրաքանչյուր սպառնալիք պետք է շատ լուրջ ընդունել՝ «Ազատության» հետ զրույցում շեշտել է թուրքագետ Ռուբեն Սաֆրաստյանը։ «Թուրքիան իր զինված ուժերը պահում է երկրից դուրս տարբեր երկրներում՝ և՛ Մերձավոր Արևելքում, և՛ Աֆրիկայում։ Բացի դրանից, Թուրքիան ոչ միայն զինված ուժեր է ուղարկել երկրից դուրս, այլ նաև դրանք կիրառում է»,– ասում է Սաֆրաստյանը։ Ուստի Թուրքիայի կողմից հնչող սպառնալիքներին Հայաստանը շատ լուրջ պետք է վերաբերի։

Սաֆրաստյանը նշում է՝ կան տեղեկություններ առ այն, որ բացվել են հատուկ օֆիսներ, որտեղ ցուցակագրում են Ադրբեջան մեկնելու և մարտերում մասնակցելու ցանկություն ունեցող մարդկանց։ Հայտնի է, որ նրանք թուրքական կառավարությունից ամսեկան ստանալու են 2500-3500 դոլար աշխատավարձ։

Քրդական աղբյուրներից ստացված տեղեկությունները նույնպես արտացոլում են այն քաղաքականությունը, որ Թուրքիան վարում է Հարավային Կովկասում։ Հիմնական նպատակն է, օգնելով Ադրբեջանին, հնարավորություն տալ վերջինիս ուժեղացնել իր դիրքերը Հարավային Կովկասում որպես իր դաշնակցի՝ դրանով իսկ ամրապնդելով իր ներկայացվածությունը տարածաշրջանում։ Հրահրելով ադրբեջանական կողմի ագրեսիան՝ Թուրքիան ձգտում է թուլացնել Ռուսաստանի ազդեցությունը Հարավային Կովկասում, և այս ծրագրերը իրականացնելու համար Թուրքիան Սիրիայից վարձկաններ է տեղափոխում Ադրբեջան, որոնք ամենաիսկական սպանությունների մեջ մասնագիտացած ահաբեկիչներ են։

Հիշեցնենք, որ Թուրքիայից պարբերաբար հնչում են աջակցական հայտարարություններ ուղղված եղբայրական Ադրբեջանին, իսկ նախագահ Ռեջեփ Թայիփ Էրդողանը լրատվամիջոցների հետ զրույցում նշել է, որ Ադրբեջանից ժամանած պատվիրակությունը և թուրքական ռազմական ղեկավարությունը համապարփակ քննարկումներ են ունեցել՝ համատեղ ուժերով հայ-ադրբեջանական սահմանին ծագած ռազմական գործողություններն ավարտին հասցնելու համար։

Թուրքիայի՝ տավուշյան զարգացումներում ներգրավվածության մասին խոսել է վարչապետ Փաշինյանը Ռուսատանի վարչապետ Միխայիլ Միշուստինի հետ հանդիպման ժամանակ։ «Իրադարձությունները տեղի են ունենում երրորդ կողմի հրահրման ֆոնին և դեռ պետք է հասկանալ՝ ո՞վ, ինչո՞ւմ և ինչո՞ւ է հետաքրքրված»,- ասել է Փաշինյանը։

Քրիստինե Հովսեփյան