Կառավարության այսօրվա նիստում որոշում կայացվեց 2019 թվականի մանկատան բոլոր շրջանավարատներին ապահովել բնարակարաններով։ Հարցը նիստում ներկայացրեց Աշխատանքի և սոցիալական հարցերի նախարար Զարուհի Բաթոյանը.
«Նախագծով առաջարկվում է 2003-2015 թվականների ընթացքում «Պետական աջակցություն ՀՀ մակական խնամակալական կազմակերպությունների շրջանավարտներին» ծրագրի շրջանակներում հատկացված բնակելի տարածությունը կամ բնակարանը նվիրաբերել դրանք զբաղեցրած 163 մանկատան շրջանավարտների։ Բնակարանները տրամադրվել էին անհատույց օգտագործման իրավունքով՝ 10 տարի ժամկետով։ Պայմանագրով նախատեսվում էր, որ բնակարանը հետագայում կարող էր մասնավորեցվել կամ տրվել վարձակալության։ Չնայած դրան՝ մանկատան շրջանավարտների դիմումներին ընթացք չէր տրվել և շրջանավարտներից երեքի զբաղեցրած բնակարանների շենքերի նախնական վիճակը, համաձայն Քաղաքաշինական կոմիտեի ներկայացրած տվյալների, դեռևս 2003-2004 թվականներին ՝ այսինքն մինչ պայմանագրի կնքումը, գնահատվել է երրորդ աստիճանի վնասվածության, ուստի նախագծով առաջարկվում է այս շահառուներին տրամադրել բնակարանի գնման վկայագիր՝ այն պայմանով, որ կհանձնեն նախկինում իրենց հատկացված տարածքը»։
Նախարարը հիշեցրեց, որ հերթացուցակում ներառված, բայց բնակարաններ չստացած մնացած շահառուների համար 2019 թվականին մեկնարկեց բնակարանների գնման վկայագրեր տրամադրելու գործընթացը, արդյունքում շրջանավարտներին հնարավորություն տրվեց ձեռք բերել բնակարան սեփականության իրավունքով։
«Այսպիսով նույն կարգավիճակով անձինք հայտնվեցին անհավասար պայմաններում, ուստի նախագծի ընդունմամբ կվերացվի այս անհավասարությունը և կամբողջացվի 1991-2019 թվականների մանկատան շրջանավարտների բնակարանային խնդիրների լուծումը։ Խնդրում եմ հաստատել»,- մանրամասնեց տիկին Բաթոյանը։
Վարչապետն իր հերթին հայտնեց. «Շեշտը պետք է դրվի մանկատան սաների պատշաճ կրթություն ունենալու իրավունքի վրա։ Երկու օր առաջ մենք աշխատանքային հանդիպման ժամանակ քննարկել ենք այդ հարցը, թե կոնկրետ ինչ միջոցներ պետք է ձեռնարկենք, որպեսզի մանկատան սաներին այնպիսի հմտություններով կարողանանք օժտել, որ նրանք 1-2 տարի հնարավոր է վարձակալության փոխհատուցում ստանան, հետո իրենք իրենց աշխատանքով բնակարան ձեռք բերեն»։
Քրիստինե Հովսեփյան
