«Ինչո՞ւ էին մարտիկները կռվում 80-ականների զենքերով, իսկ իսկանդերն այդպես էլ չկրակեց»,- լրագրողի հարցին Սերժ Սարգսյանը պատասխանեց, որ այդ հայտարարությունը հնչել է քառօրյայից անմիջապես հետո՝ Գերմանիայում, իսկ քաջատեղյակ մարդիկ գիտեն, որ 16 թվականին Գերմանիան նախագահում էր ԵԱՀԿ-ում։
«Այդ հայտարարությունը շատ մեծ շահարկումների տեղիք տվեց այն մարդկանց կողմից, ովքեր լավ չեն հասկանում, թե ինչ է պատերազմը։ Իմ ասածը թարգմանենք դիվանագիտական լեզվով, հետևյալն էր․«Հարգելի ԵԱՀԿ անդամներ, անկախ այն հանգամանքից, որ դուք աչք եք փակում Ադրբեջանի կողմից մինչև ատամները զինվելու հանգամանքի վրա, մեր մարտիկները կարողանում են պաշտպանել իրենց հայրենիքը»։ Դա շատ պարզ բան է»,- ասում է նախագահը։
Սերժ Սարգսյանը հարց է հնչեցնում՝ կա՞ աշխարհում մի բանակ այսօր, որը չունի 80-ականների զենք։ «Եթե կգտնվի այդպիսի բանակ, անգամ ամենաժամանակից բանակների թվում, ապա ես կհայտարարեմ, որ ես ոչինչ չեմ հասկանում։ Նույնիսկ այսօր ոչ միայն մեր զինված ուժերի զինանոցում են 80-ականների զենքերը, այլ նաև ամենահարուստ և ամենամեծ ապահովություն ունեցող զինված ուժերում»,- հայտարարում է վերջինս։
Սարգսյանը ընդգծում է՝ մեր բանակի, այլ բանակների (ԱՄՆ, Իսրայել) այսօրվա զինանոցում էլ առկա են նույնիսկ 40-ականների զենքեր։ Իսկ շահարկումները թեմային չտիրապետելու պատճառով են կամ այլ քաղաքական նպատակներ են հետապնդում։
Իսկ իսկանդերը չկրակեց, որովհետև քառօրյա պատերազմը, առաջին հերթին լայնածավալ պատերազմ չէր, այլ՝ պարզապես լայնածավալ ռազմական գործողություններ էին։ «Իսկանդերի օգտագործումը կլիներ՝ կրակոց թնդանոթից ճնճղուկների վրա։ Այն հզոր զենք է և կիրառվում է թշնամուն զսպելու համար»,- եզրափակում է Սերժ Սարգսյանը։
Քրիստինե Հովսեփյան
