«Մենք ներողություն խնդրելու որևէ առիթ չունենք Ադրբեջանից»,- անդրադառնալով Սաքուրի՝ Նիկոլ Փաշիյանին ուղղված ռազմական հանցագործությունների համար ներողություն խնդրելու հարցին, պատասխանի իր տարբերակն է հնչեցնում Սերժ Սարգսյանը՝ շեշտելով, որ մենք որևէ ամաչելու արարք չենք կատարել․
«Մենք հետևելով օրենքի տառին, փորձում էինք խաղաղ ճանապարհով իրացնել ինքնորոշման մեր իրավունքը, իսկ նրանք հրոսակախմբեր ուղարկեցին մեզ վրա և փորձում էին զենքով մեզ ճնշել։ Այն բանի համար, որ նրանք իրենց կրակակետերը տեղադրել էին բնակավայրերում և այդպիսով իրենք իրենց ապահով էին զգում՝ հրետակոծելով ողջ խաղաղ բնակչությանը։ 92 թվականին՝ մինչև մայիս ամիս, օր է եղել Ստեփանակերտի վրա մինչև 350 ռումբ, արկ ու հրթիռ է ընկել։ Այդ բա՞նի համար ներողություն խնդրենք»։
«Ես և իմ մարտական ընկերները որևէ կոմպլեքս չունենք ներողություն խնդրելու, բայց դրա համար հիմք է պետք։ Մենք ամաչելու ոչինչ չունենք, մենք կամաչեինք, եթե չդիմադրեինք, չպաշտպանեինք մեր օճախները։ Եթե բոլորս հավաքվեինք Երևանում և «Ստեփանակերտ» երգեինք, այդ ժամանակ մենք պետք է ներողություն խնդրեինք, բայց ոչ Ադրբեջանից, այլ մեր ժողովրդից և, առաջին հերթին, այն տղաներից, ովքեր իրենց կյանքի գնով պաշտպանում էին յուրաքանչյուր մետր»,- հայտնում է երրորդ նախագահը։
«Իհարկե, ցավում եմ նրա համար, որ և՛ Ադրբեջանի կողմից, և՛ հայկական կողմից եղան բազմաթիվ զոհեր քաղաքացիական բնակչության շրջանում, բայց, ցավոք սրտի, պատերազմի առանձնահատկություններից մեկն էլ այդ է»,- ավարտում է Սերժ Սարգսյանը։
Քրիստինե Հովսեփյան
