Լրագրողի այն հարցին, թե արդյոք Սերժ Սարգսյանը պատասխանատվություն է զգում Ապրիլյան պատերազմի զոհերի համար և պատրաստ է ներողություն խնդրել նրանց ընտանիքներից, նախագահը պատասխանեց․
«Ես պատրաստ եմ պատասխանատվություն կրել ոչ միայն ապրիլյան պատերազմում զինված զինվորների համար, այլ նաև առաջին Արցախյան պատերազմում զինված զինվորների համար։ Ես պատասխանատվություն եմ կրում բոլոր այն զինվորների և սպաների համար, ովքեր զոհվել են, ընդհանրապես 1988-ից սկսած, թույլ տվեք ասեմ, մինչև այսօր։ Ներողություն բառը այստեղ տեղին չի, ես իմ երախտագիտությունն եմ հայտնում, խոնարհումն եմ հայտնում նրանց ընտանիքներին և կոչ եմ անում բոլորին՝ շատ ուշադիր լինել այդ ընտանիքների նկատմամբ»։
Սարգսյանը շեշտում է՝ հասարակության ճիշտ վերաբերմունքը այն խթաններից մեկն է, որ մեր այսօրվա և վաղվա սպաներին և զինվորներին պետք է դրդի, համոզի, որ նրանք ամուր պահեն մեր հայրենիքի սահմանները։
«Մենք այսօր հաղթել ենք, մենք այսօր ունենք ազատ, անկախ Արցախ, ունենք մարտունակ բանակ և այդ ամենը մեր զինված տղաների գործի արդյունքն է»,- ասում է նա։
Քրիստինե Հովսեփյան
