Հայաստանը այն երկրներից է, որ շուրջ 5 ամիս արտակարգ դրություն է հայտարարել, իսկ սահմանները բացելու առաջին նախապայմաններից մեկը արտակարգ դրության չեղարկումն է՝ այսպիսի միտք է արտահայտել Էդմոն Մարուքյանը առցանց թողարկման ժամանակ։
Նրա խոսքով՝ պարտվել ենք երկու առումներով՝ տնտեսության մեջ չներարկվեցին գումարներ՝ տնտեսությունն «իջավ ներքև», և եղավ հակառակը՝ համավարակի թվերը աճեցին՝ վատ կառավարման արդյունքում։
«Շատ երկրներ, որտեղ պանդեմիան շատ ավելի վատ վիճակում է, չկա հայտարարված արտակարգ դրություն։ Մեր կարծիքով՝ առաջին ամսի արտակարգ դրությունը ծայրահեղ անհրաժեշտ էր, որից հետո այն պետք է հանվեր և պետք է պահվեր համաճարակային ուրիշ կանոններով իրավիճակը։ Եվ մեր տնտեսությունն էլ, դրսի շփումներն էլ հնարավորինս պետք էր պահպանել»,- ասել է ԼՀԿ ղեկավարը՝ հավելելով, որ հիմա, համավարակային վիճակը հաղթահարելով, հայտնվելու ենք խորը տնտեսական ճգնաժամի մեջ։
Էդմոն Մարուքյանի կարծիքով՝ տնտեսության վերականգման համար պետք է ներկայիս տնտեսական ամբողջ բլոկը փոխել, պետք է ազատվել «Սերժ Սարգսյանի երկրորդ էշելոնի կադրերից», ինչի մասին իրենք բարձրաձայնել են դեռ 2 տարի առաջ և գործը վստահել «գործից հասկացող մասնագետների»։
Մարուքյանը հարց է հնչեցնում՝ «ո՞վ է Հայաստանում տնտեսությամբ զբաղվում», քանզի այդպես էլ պարզ չի մինչև օրս ո՞վ է երկրում առկա տնտեսական խնդիրների պատասխանատուն։
Քրիստինե Հովսեփյան
