ՀՀ կառավարության որոշմամբ՝ 163 ընտանիքների կնվիրաբերվի 2003-2010 թ.-ի ընթացքում պետության կողմից 10 տարի անհատույց օգտագործման իրավունքով նրանց հատկացված սոցիալական բնակարանները,- տեղեկանում ենք ՀՀ աշխատանքի և սոցիալական հարցերի նախարարության տարածած հաղորդագրությունից։
Մասնավորեցման համար այդ բնակարանները զբաղեցնող անձինք պետք է անձամբ դիմում ներկայացնեն նախարարություն, որոշումն ուժի մեջ մտնելուց հետո 12 ամիսների ընթացքում, դրան կցելով պայմանագիրը և անձը հաստատող փաստաթուղթը, որին հաջորդելու է նվիրաբերության եռակողմ պայմանագրի (նախարարություն, պետգույքի կառավարման կոմիտե և շահառու) կնքումը, բնակարանները մասնավորեցումից հետո չեն կարող օտարվել դրան հաջորդող 24 ամիսների ընթացքում։
