«Բարգավաճ Հայաստան», «Հայ Յեղափոխական Դաշնակցություն» և «Հայրենիք» կուսակցությունները հերթական անգամ հանդիպել են։ Այս մասին տեղեկանում ենք երեք կուսակցությունների տարածած հաղորդագրությունից։
«Քննարկելով համավարակի հետևանքով երկրում ստեղծված ծանր սոցիալ-տնտեսական կացությունը, գործազրկության և աղքատության հարաճուն տեմպերը, աշխատանքային խումբը որոշեց մշակել արտակարգ դրության իրավական ռեժիմի խախտման պատճառով կիրառված տուգանքները չեղարկելու (համաներելու) մասին նախագիծ։ Առաջիկայում այն ՀՀ Ազգային Ժողովում շրջանառության մեջ կդնի «Բարգավաճ Հայաստան» կուսակցությունը»,- ասված է հայտարարության մեջ։
Նշվում է նաև, որ աշխատանքային խումբը դատական կարգով վիճարկելու է դիմակ չկրելու համար կիրառվող անհիմն տուգանքները և միջնորդելու է դատարանին՝ կասեցնելու Պարետի համապատասխան որոշումը։
Նաև՝ հաշվի առնելով, որ ՀՀ գլխավոր դատախազությունը մերժել է բարձրաստիճան մի խումբ պաշտոնատար անձանց հանցագործության մասին քրեական գործի հարուցումը մերժելու վերաբերյալ բողոքը, աշխատանքային խումբը որոշել է դիմել դատարան՝ պարտավորեցնելով հարուցել քրեական գործ։
