Կառուցելու ենք գործող իշխանության այլընտրանք լինելու համակարգը. Էդմոն Մարուքյան

«Մարդիկ մեկ տարի առաջ շատ մեծ հույսեր ունեին համաչափ տարածքային զարգացման իմաստով, այսօր շատ մեծ հիասթափություն կա։ Այդ հիասթափության հետ մեկտեղ նաև էն տեղերում, որտեղ ասֆալտ, շինարարություն  է արվում,  մարդիկ դրական էմոցիաներով լցված են»,- ասաց Էդմոն Մարուքյանը brighttalk-ի շրջանակներում՝ հավելելով՝ քաղաքներում մարդիկ միայն ասֆալտով չեն գոհանում, ապրում են այլ տրամաբանության մեջ, լավություն չեն համարում կատարվածը և պահանջում են կյանքի որակի բարձրացում, ռեֆորմների իրականցում։

«Կյանքի որակը քաղաք Երևանի հետ համեմատած անգամներ ցածր է մարզերում, որի պատճառով էլ մենք ունենք, ըստ էության, քաղաք պետություն։ Երևանը առանձին պետություն է պետության մեջ իր աբսուրդներով»,– ընդգծեց ԼՀԿ ղեկավարը։

Մարուքյանը հարց հնչեցրեց՝ որքանո՞վ է արդար, որ Երևանում մանկապարտեզները անվճար են, իսկ մարզերում վճարովի։ Պետք է վերականգնել սոցիալական արդարությունը՝ պետք է այնպես անել, որ մարզերում նույնպես մանկապարտեզները դառնան անվճար։ «Հիմա դա թալանչիների փողերով եք անում, թե ո՞նց եք անում, պետք է արվի»,- շեշտում է Մարուքյանը։

Կուսակցապետի խոսքով՝ մարդիկ շարունակելու են ձգտել դեպի մեծ քաղաքներ՝ տվյալ դեպքում Երևան, որտեղ կյանքի որակը ավելի բարձր է։ Եվ արդյունքում ունենալու ենք գերկենտրոնացում՝ բնապահպանական, առողջապահական, կառավարման, տրանսպորտային բոլոր տեսակի խնդիրներով, նաև ունենալու ենք ազգային անվտանգության համար վտանգ սպառնացող պրոբլեմ սահմանամերձ և այլ գյուղական համայնքների համար, որտեղ օդի պես անհրաժեշտ է, որ մարդիկ ապրեն և զբաղվեն գյուղատնտեսությամբ։

Էդմոն Մարուքյանը նշեց, որ քաղաքական խմբավորումն անդադար թիրախավորելու է մարդկանց խնդիրների լուծումը, որովհետև իրենք ընտրությունների ժամանակ ասել են՝ գնում են իրենց ներուժը, գիտելիքն օգտագործելու «բացված պետական շինարարության մեջ»։ Իրենք մի ուղղությամբ շարունակելու են պետական շինարարության մեջ իրենց ներդրումն ունենալ, իսկ մյուս ուղղությամբ՝ կառուցելու են գործող իշխանության այլընտրանք լինելու համակարգը, որը լինելու է ապագա իշխանություն, քանզի ցանկացած «նորմալ երկրում գործող ընդդիմությունը, դա ապագա իշխանությունն է»։

Քրիստինե Հովսեփյան