«Ցանկանում եմ շնորհավորել Արցախի մեր գործընկերներին Արցախի Հանրապետության հռչակման օրվա կապակցությամբ»,- հրավիրված ասուլիսում որպես նախաբան ասում է ԱԳՆ մամուլի խոսնակ Աննա Նաղդալյանը։
Խոսնակը շեշտում է՝ այս տարիների ընթացքում Արցախը ապացուցել է իր կարողությունը կազմակերպելու երկրի հասարակական քաղաքական կյանքը, ապահովելու իր բնակչության անվտանգությունը, ինչպես նաև ստանձնելու միջազգային պարտավորություններ հատկապես ժողովրդավարության և մարդու իրավունքների առաջմղման ուղղությամբ։ Արցախի ժողովուրդը ժողովրդավարական ճանապարհով ընտրված իր իշխանություններին լիազորել է համապատասխան մանդատով ներկայացնելու իր շահերը միջազգային հարթակում և, նախ և առաջ, խաղաղ գործընթացում։
Նաղդալյանը ընդգծում է՝ ժողովուրդը լիազորել է իշխանություններին նաև երաշխավորելու Արցախի անվտանգության համակարգի համապարփակությունը, ապահովելու երկրի բնականոն զարգացման և բարգավաճման համար ներքին և արտաքին համապատասխան պայմաններ։
«Ցանկանում եմ նշել, որ մենք Արցախի մեր գործընկերների հետ ունենք շատ սերտ համագործակցություն, այդ համագործակցությունը իրականացվում է Արցախի և Հայաստանի միջև տարբեր մակարդակներով, և մենք պատրաստակամ ենք ձեռնարկել շարունակական քայլեր այդ համագործակցությունն առավել զարգացնելու ուղղությամբ»,- եզրափակում է խոսնակը։
Քրիստինե Հովսեփյան
