Օգոստոսի 31-ից սեպտեմբերի 3-ի` ժամը 12:00 դրությամբ, հանրապետությունում արձանագրվել է ալկոհոլային թունավորման 38 դեպք, որից 25-ը` Արմավիրի մարզից, 12-ը` Երևանից, 1-ը` Կոտայքի մարզից: Ցավոք, նաև գրանցվել է մահված 14 դեպք:
Այս մասին հայտնում են ՀՀ առողջապահության նախարարությունից՝ նշելով, որ ալկոհոլային թունավորման դեպքերից տուժածները բուժում են ստանում հանրապետության տարբեր բժշկական կազմակերպություններում:
Իրականացված համաճարակաբանական հետազոտության արդյունքում պարզվել է, որ Արմավիրի մարզի տուժածների թունավորման հավանական աղբյուր է հանդիսացել մեկ վայրից ձեռք բերված ոչ գործարանային արտադրության օղու օգտագործումը:
Երևանի դեպքերից տուժածների մեծամասնությունն օգտագործել է բժշկական սպիրտ` որպես օղու փոխարինիչ, մյուս մասի, ինչպես նաև Կոտայքի մարզում արձանագրված դեպքից տուժածի օգտագործած սպիրտի տեսակը պարզելու համար համաճարակաբանական հետազոտությունները շարունակվում են:
Հիշեցնենք, ալկոհոլային թունավորման առաջին դեպքերն արձանագրվել էին օգոստոսի 31-ից սեպտեմբերի 1-ին, մեկ օրում գրանցվել էր միանգամից 11 մահ, մեծ մասամբ՝ Արմավիրի մարզից: Օղի պատրաստած եւ վաճառած անձը հայտնաբերվել ու ձերբակալվել է, կատարվում է քննություն, հարուցվել է քրեական գործ:
