Ազգային ժողովում լրագրողների հետ ճեպազրույցում ԱԺ պետաիրավական հարցերի մշտական հանձնաժողովի նախագահ Վլադիրմիր Վարդանյանը անդրադարձավ ՍԴ դատավորի թեկնածուի պաշտոնում առաջադրված Երվանդ Խունդկարյանի հետ «Իմ քայլը» խմբակցության պատգամավորների հանդիպմանը։
Ասաց՝ հանդիպում Երվանդ Խունդկարյանի հետ խմբակցությունում եղել է և ինքը նիստին մասնակցել է, բայց հարցեր չի տվել, քանի որ իրենք պարոն Խունդկարյանի հետ գրեթե աշխատել են նույն հանձնաժողովում և միասին բազում հարցեր են քննարկել։ Թեկնածուների հետ հանդիպումները և քննարկումները նախատեսված են այն հիմնավորմամբ, որ պատգամավորների մոտ ձևավորվի ընկալում, թե արդյոք տվյալ անձը համապատասխանում է ՍԴ դատավորի պաշտոնը զբաղեցնելուն, թե ոչ։
Պատգամավորը միասնական քվեարկության մասին ճշտող հարցադրումները հակասահմանադրական է համարում, գաղտնի քվեարկությունն արդեն ենթադրում է, որ յուրաքանչյուր պատգամավոր ինքն է որոշում ինչպես քվեարկել։
ՀՀ նախագահ Արմեն Սարգսյանի առաջադրած թեկնածուի՝ Արթուր Վաղարշյանի մասով Վարդանյանը շեշտում է՝ նախագահի սահմանադրական իրավունքն է ներկայացնել ՍԴ դատավորի թեկնածու, իսկ Ազգային ժողովի իրավունքն է որոշել՝ դրական, թե բացասական քվե տալ տվյալ թեկնածուին։ Օրենսդիրը չի բացառում, որ պարոն Վաղարշյանը կարող է նոր մոտեցումներ, նոր տեսլական ներկայացնել Ազգային ժողովում։
Վահրամ Ավետիսյանի հետ հանդիպմանը Վարդանյանը նույնպես մասնակցել է։ Ամենատարբեր հարցադրումներ են եղել պատգամավորների կողմից, քննարկումից հետո Ավետիսյանի՝ իմքայլականների հետ եղած մոտեցումների տարբերության մասին հայտարարությունը զարմացրել է Վարդանյանին, քանի որ նիստի ժամանակ երկկողմ կարծիքներ են հնչել, որ Սահմանադրական դատարանը պետք է լինի ապաքաղաքականացված։
Քրիստինե Հովսեփյան
