ՀՀ-ում մինչև սույն թվականի սեպտեմբերի 11-ը երկարաձգված արտակարգ դրությունը չի երկարաձգվելու: Այս մասին այսօր Ազգային ժողովում «Հայաստանի Հանրապետության բնակչության սանիտարահամաճարակային անվտանգության ապահովման մասին» օրենքում փոփոխություն և լրացումներ կատարելու մասին օրենքի նախագծի քննարկման ժամանակ ասաց Արդարադատության նախարարի առաջին տեղակալ Ռաֆիկ Գրիգորյանը։
Նրա խոսքով՝ առաջարկվող օրենսդրական փաթեթն ուղղված է ապահովելու անհրաժեշտ օրենսդրական այնպիսի գործիքակազմ, որ հնարավորություն կտա կիրառել որոշակի միջոցառումներ և սահմանափակումներ վարակիչ հիվանդությունների ծագման ու տարածման վտանգի, համաճարակի առաջացման և դրանց հետևանքով արտակարգ իրավիճակ առաջանալու պայմաններում։
Փոխնախարարը նշեց, որ առաջարկվող օրենսդրական փաթեթը հիմնականում պահպանել է այժմ կիրառվող սահմանափակումների որոշ հատվածը։ Այնպիսի սահմանափակումներ, ինչպիսին եղել են էլեկտրոնային հսկողության համակարգի միջոցով անձանց տեղորոշումն ու վարակակիրների հայտնաբերումը, չի կիրառվելու։ Այդ տվյալները ոչնչացվելու են։
