ՀՀ քաղաքացին ո՞ր պահից սկսած դարձավ տուգանքի մատերիալ. ԼՀԿ-ական պատգամավոր

Այսօր Ազգային ժողովում քննարկվող օրենսդրական փաթեթը սպասված էր, անհրաժեշտությունը զգացվում էր, բայց սպասումները այլ էին՝ հայտարարեց ԼՀԿ պատգամավոր Կարեն Սիմոնյանը։

«Սպասել ենք մի այլ իրավակարգավորումների, ստացել ենք լրիվ ուրիշ իրավակարգավորումներ»,- ԱԺ ամբիոնից հայտարարեց Կարեն Սիմոնյանը։

Նոր նախագծով առաջարկվում է 11 նոր տեսակի տուգանքների ներմուծում, որ նշանակում է մարդիկ կտուգանվեն ավելի շատ։ Այստեղից պատգամավորի մոտ մի քանի հռետորական հարցեր են ծագել․

«Հայաստանի Հանրապետության քաղաքացին ո՞ր պահից սկսած դարձավ տուգանքի մատերիալ, և երկրորդը՝ ո՞ր պահից սկսած մենք որոշեցինք, որ գնում ենք ոչ թե հասարակության իրավագիտության բարձրացման, համագործակցող հասարակություն ունենալու ճանապարհով, այլ զուտ տուգանքներով սահմանափակվելով։ Մենք ի՞նչ մոդելի պետություն ենք ուզում ունենալ և ի՞նչ մոդելի հասարակություն», – հարցադրումներ է հնչեցնում Սիմոնյանը։

Նաև պատգամավորի մոտ հարցեր է առաջացրել սահմանված տուգանքների միջև եղած մեծ տարբերությունները՝ օրինակ՝ նշված է 150-ապատիկից մինչև 500-ապատիկ, բայց չի նշված, թե ինչպիսի իրավիճակում որ չափը պետք է կիրառի լիազոր մարմինը կամ դատավորը։ Պետք է հստակեցնել տուգանքների չափերը՝ բացառելով հայեցողական մոտեցումը։

Քրիստինե Հովսեփյան